М. Ш. Шаймиев: "Театрны шулай яңартырга кирәк ки, үзебезне үзебез ихтирам итәрлек булсын"

25 февральдә Татарстан Президенты М.Ш.Шаймиев М.Җәлил исемендәге Татар дәүләт опера һәм балет академия театрында шушы театр бинасын яңарту һәм аңа реконструкция ясау мәсьәләләре буенча эш киңәшмәсе үткәрде.

Яңартыла торган бинаны карап, М.Ш.Шаймиев бүгенге көнгә эшне оештыру һәм эш темпларының канәгатьләнмәслек булуын әйтте. Хәлбуки барлык эшләр 2005 елның 1 гыйнварына төгәлләнергә тиеш, Казанның 1000 еллыгына багышланган тантаналы җыелыш нәкъ менә шушы бинада уздырылачак.

Киңәшмә барышында М.Ш.Шаймиев башкарыла торган эшнең сыйфатына аеруча игътибар бирде, әлеге эш шушы уникаль бинаның мәгърурлыгын торгызырга һәм Татарстанда опера һәм балет сәнгатен үстерүгә бәйле исемнәрне мәңгеләштерергә тиеш.

Ул күрсәтеп узганча, шушы меһим эшкә тәҗрибәле, сыналган осталарны җәлеп итү зарур. Эш күләмен муафыйк билгеләп һәм, технологик җиһазлар алу, төзү-монтаж эшләрен башкару өчен бүлеп бирелгән акчаны вакламыйча, заказчы һәм барлык подрядчылар эшен көйле алып барырга кирәк.

Киңәшмә эшендә ТР Премьер-министры Р.Н.Миңнеха-нов, Дәүләт Советы Рәисе Ф.Х.Мөхәммәтшин, Казан мэры К.Ш.Исхаков, министрлык һәм ведомство, театрны яңарту эшләрен алып баручы проект һәм төзү-монтаж оешмалары җитәкчеләре катнашты.