Минтимер Шәймиев: “Рәссамнар тудырган иҗат җимешләре бәяләп бетергесез”

23 декабрьдә Татарстан Республикасы Президенты Минтимер Шәймиев ТР Рәссамнар берлеге әгъзаларын 70 еллык бәйрәмнәре белән тәбрикләп, юбилейга багышланган күргәзмә белән танышты.

Тантанада шулай ук ТР Дәүләт Советы Рәисе Фәрит Мөхәммәтшин, ТР Премьер-министры урынбасары – мәдәният министры Зилә Вәлиева, Казан шәһәре мэры Илсур Метшин, республиканың мәдәният һәм сәнгать әһелләре катнашты.

“Бүген күргәзмәне ачу белән бергә, Татарстанда әдәбият һәм сәнгать елының тагын бер юбилее – рәссамнар берлегенең 70 еллыгын билгеләп үтәбез. Татарстан сынлы сәнгатенең язмышы бәхетле булды, аның нигез ташын күренекле сәнгать осталары – Николай Фешин, Бакый Урманче һәм башкалар салды”, - дигән сүзләре белән ачып җибәрде Зилә Вәлиева тантананы. Россия рәссамнары берлеге белән чагыштырганда, Татарстан рәссамнары берлеге 20 елга өлкәнрәк санала. Мәдәният министры әйтүенчә, моның сәбәбе, республикада иҗат предприятиеләренең оештыру структуралары иртәрәк формалашуында. “Рәссамнар берлеге ул – талантлы кешеләр туганлыгы, алар иптәшләрчә үзләренең шөгыльләренә генә хас проблемаларны уртага салып сөйләшә һәм бер-берсенә ярдәм кулы суза”, - ди Зилә Вәлиева.

Юбилей уңаеннан зур сөенече белән Татарстан рәссамнар берлеге рәисе Абрек Абзгильдин да уртаклашты. Ул киләчәктә дә пумала осталарының Татарстан халкы өчен хезмәт итүенә вәгъдә бирде. Абрек Абзгильдин бәйрәм белән котлау өчен, Чабаксар, Йошкар-Ола һәм Ижау шәһәрләреннән дә хезмәттәшләрнең килүен хәбәр итте, күп кенә төбәкләр исә, тәбрикләү сүзләре һәм теләкләр язылган телеграммалар юллаган.

Россия рәссамнары берлеге сәркатибе Николай Соломин, үз чиратында, РФ рәссамнары иҗат берләшмәсе исеменнән котлау сүзләре яңгыратты. “Республика чын мәгънәсендә үзен мөстәкыйль итеп күрсәтә алды. Эмоциональ сәнгатьлелек чагылышларының ачык булуы, төпле фикерләүләр, мөһим идеяләр Татарстан сынлы сәнгатенең куәтен дәлилли. Татарстан сәнгате Россия мәдәниятен тәшкил итүче мөһим өлешләрнең берсе. Бүгенге юбилей сезнең елъязмагызда яңа ачылган бер бит булып теркәлсен”, - диде ул.

“Хөрмәтле рәссамнарыбыз, сезне барыгызны да Татарстан рәссамнары берлеге оешуга 70 ел узу тантанасы белән шәхсән үз исемемнән, ТР Дәүләт Советы һәм ТР Хөкүмәте исеменнән котлыйм. Тарихыбызны мәңгеләштергән, аның иң якты ядкарьләрен гәүдәләндерүче һәм тормышның төрле күренешләрен тасвирлаучы төрле буын рәссамнарына да рәхмәтемне җиткерәм”, - дип мөрәҗәгать итте Минтимер Шәймиев иҗат әһелләренә. Президент рәссамнарның нечкә күзаллауларын һәм тормышны башка күзлектән чыгып чагылдыруларын да ассызыклады. Ул ветеран рәссамнарга да олы рәхмәтен ирештерде, гәрчә аның фикеренчә, ветеран сүзе бу очракта бик үк туры килеп бетми. “Рәссам ветеран була алмый”, - ди ул.

“Сез тудырган иҗат җимешләре бәяләп бетергесез, кайбер вакытта картиналарыгызның сатып алынмавы да шуңа бәйледер, аларга бәя куеп булмый”, - ди Илбашы. Ул аларның талантына сокланып, җир кешесенә барлык нечкәлекләрне дә аңлап бетерү сәләте бирелмәгәнлегенә басым ясады. Минтимер Шәймиевның, “рәссам булыр идем мин ”, дигән белдерүе дә, рәссамнарның ирекле кош кебек булуына бәйледер, мөгаен. Президент үзе дә: “Рәссамнар эчтән үзләрен ирекле итеп хис итүләре белән бәхетле”, - диде. “Рәсем ясау, иҗат итү ул тырышлык таләп итми, бу сәләт тумыштан Аллаһы Тәгалә тарафыннан бүләк ителә”, - ди ул. “Сезнең иҗат җимешләре республика хәзинәсе генә түгел, чит төбәкләр байлыгы да. Эшләрегез мирасыбыз нигезендә тора”, - диде республика җитәкчесе.

Минтимер Шәймиев сынлы сәнгать үсешенә керткән өлешләре өчен түбәндәге рәссамнарга Мактаулы исемнәр һәм медальләр тапшырды. Күпьеллык данлыклы хезмәте өчен Эрот Зарипов һәм сынлы сәнгать үсешенә кертеме өчен Георгий Зяблицев “Казанның 1000 еллыгы истәлегенә” медальләре белән бүләкләнде. “Татарстан Республикасының халык рәссамы” Мактаулы исеме Владимир Акимов һәм Рөстәм Кильдибековка бирелде. “Татарстанның атказанган сәнгать эшлеклесе” Мактаулы исеменә Рифкат Вахитов, Анатолий Крылов һәм Рабис Сәлахов лаек булды. “ТР атказанган сәнгать эшлеклесе” исеме белән скульптор Асия Миңнуллинаның да казанышлары билгеләп үтелде. Минтимер Шәймиев аның атлар ясауда осталыгына мактау сүзләрен җиткерде.

“Татарстан бәхете өчен күпьеллык данлыклы хезмәт өчен” Татарстан Республикасы Президентының Рәхмәт хаты Татьяна Зуевага тапшырылды.

Күргәзмә ачылышында шаһәдатнәмә тактасына Минтимер Шәймиев һәм башка кунаклар имзаларын куйды. Алга таба Президент күргәзмә эшләре белән танышуга кереште. Күргәзмәдә 200 дән артык авторның картинасы тәкъдим ителгән. Сынлы сәнгать, графика, скульптура, театраль-декорация юнәлешләрендәге әсәрләр пейзаж, натюрморт, портрет һәм башка жанрларда.
Мәртәбәле кунаклар арасында Россия сәнгать академиясе вице-президенты, В. Суриков исемендәге университет ректоры Анатолий Бичуков та бар иде.