Минтимер Шәймиев Татарстан балаларын Президент чыршысында сәламләде

27 декабрь көнне Казанда республика мәктәп укучылары өчен Президент чыршысы узды. "Баскет-холл" бинасына бөтен республика буенча 5500 бала җыелды.

Яңа ел бәйрәменә чакырылган 7-11 сыйныфларда укучы малайлар һәм кызлар барысы да - уку алдынгылары, төрле фестивальләрдә, спорт ярышларында җиңүчеләр. Быел Татарстанда Хәйрия елы узуын исәпкә алып, Президент чыршысына социаль приют, балалар йортлары һәм интернатларда тәрбияләнүче балалар да күп чакырылган иде.
Минтимер Шәймиевне ишек янында бәйрәмчә киенгән балалар һәм төрле әкият геройлары каршы алды. Алар Татарстан Президентын Яңа елга багышлап фойеда оештырылган балалар кул эшләре күргәзмәләре белән таныштырды, шунда ук Илбашын "Йолдызлык-Созвездие" республика балалар фестивале лауреатлары музыкаль чыгышлары белән сәламләде.

Быелгы тамашаның сценариясе Валентин Катаевның "Цветик - семицветик" әкияте буенча төзелгән иде. Татарстан Президенты залга үтүгә зур сәгать рәсеме белән бизәлгән сәхнәгә тамашаның төп герое Зилә исемле кыз чыкты. Әкияттәгечә, сәгать төзәтүче бабай аңа җиде төсле таҗлы тылсымлы чәчәк бүләк итте. Аның берәр таҗын өзсәң - теләгең үтәлә. Зилә бәйрәм дәвамында җиде төрле теләген яңгыратты. Ул әле дөньяның барлык уенчыкларын үзенеке итәргә, әле Җир шарының көньягына, әле төньягына сәяхәт итәргә, әле затлы автомобиль иясе булырга, берәр танылган сериалда төшеп, дәрәҗәле актрисага әверелергә теләде. Сериал дигәннән, бу җирдә сәхнәгә меңләгән малайлар һәм кызларның яраткан геройлары "СТС" каналында барган "Кадеты" сериалы малайлары - Илья Сухомлин ролен башкарган Аристарх Венес һәм Алексей Сырниковны уйнаган Кирил Емельянов менде. Алар Татарстан балаларын якынлашып килүче Яңа ел белән тәбрик итте. Егетләр кереп китәргә өлгермәде, сәхнәдә яшьләрнең тагын бер кумиры пәйда булды - Россия эстрадасы йолдызы Сергей Лазарев үзенең "Вспоминай" дип исемләнгән хитын башкарды. Гомумән, бүген Зиләнең һәр теләген "тормышка ашырырга" ярдәм иткән талантлы кызлар һәм малайлар залда утырган тамашачыларга берсеннән-берсе матур җырлар һәм биюләр бүләк итте. Моңа кадәр бер Президент чыршысын калдырмаучы Мәликә дә чыгып, татарча заманча җыр башкарды.

"Баскет-холл" җыр-биюләрдән яңгырап торган саен, әкиятнең төп герое Зиләнең дә хыяллары тормышка аша барды, әмма аларның берсе дә аңа бәхет китермәде, канәгатьлек хисе бирмәде. Кызның бишенче теләге - Казанны спорт каласы, ә үзен - дөнья чемпионы итү иде, алтынчы хыялы - космоска менү булды. Бу урында Казанның цирк мәктәбе укучылары "Баскет-холл" түшәмендә аркан-тасмаларга тотынып, гаҗәеп һава акробатикасы номерларын күрсәтте.

Соңгы теләге белән Зилә дусты Рузилгә ярдәм итәргә булды. Аяклары авырту сәбәпле гадәти балалар кебек уйный алмаган, таякка таянып йөрүче бу малай көннәр буена йорты янындагы эскәмиядә утырырга мәҗбүр. Кыз аңа сәламәтлек теләде һәм шул вакытта гына ул тормышка ашкан хыялларның бәхет хисе бирә торганы булуын да аңлады. Әлбәттә, Яңа ел Кыш бабайсыз үтми - балалар янына ул Кар кызы белән бергә чыкты, аннан соң алар бергәләшеп бәйрәм чыршысын кабызды.

Яңа ел тамашасын оештыручылар бәйрәм сценариясенә шундый тирән мәгънә салулары Татарстан Президенты Минтимер Шәймиевтә соклану хисләре уятты. Ул бу әкиятне уйнап чыккан барча талантлы балаларга рәхмәт сүзләрен ирештерде. "2007 ел Татарстанда Хәйрия елы буларак узды. Без республикада бабаларыбыздан калган изге традицияләрне торгызу бурычын куйдык һәм аларны, кадерле балалар, сезгә дәвам итәргә туры киләчәк. Бүген бу залга иң талантлы, иң акыллы балаларыбыз җыелып килгән, сезнең республика куанычы булып үсүегездә шигем юк. Татарстанда һәр бала башлаган эшен ахыргача җиткерергә сәләтле шәхес булып тәрбияләнә", - дип сөйләде Минтимер Шәймиев үзенең чыгышында. "Киләсе ел илебездә һәм Татарстанда Гаилә елы буларак үтәчәк. Сизәсездер, әти-әниләрегез, укытучыларыгыз, якыннарыгыз, туганнарыгыз сезнең тәрбиягә күп көч һәм тырышлык куя, сезгә аларның өметләрен акларга телим", - диде Татарстан Президенты.
Матур гадәт буенча, бәйрәм азагында һәр балага алдагы ел - Күсе елы булачагын исәпкә алып, күсе сыман тегелгән капчыкка тутырылган тәм-томнар бүләк иттеләр.