Минтимер Шәймиев Татарстан махсус стипендиясе стипендиатлары белән очрашты

25 гыйнвар көнне Казан Кремлендә Россия студентлары көне уңаеннан Татарстан Президенты Минтимер Шәймиев Татарстан Республикасы махсус дәүләт стипендиясе стипендиатлары белән очрашты.

Очрашуда шулай ук ТР Дәүләт Советы Рәисе урынбасары Римма Ратникова, ТР мәгариф һәм фән министры Наил Вәлиев, ТР яшьләр эшләре, спорт һәм туристлык министры Марат Бариев, республика ведомстволары башлыклары, ТР Дәүләт Советы депутатлары катнашты.

Быел ТР махсус дәүләт стипендияләре белән дәүләти һәм дәүләт аккредитацияле дәүләти булмаган вузларның 20 аспиранты, дәүләти, шул исәптән хәрби, һәм дәүләт аккредитацияле дәүләти булмаган югары һөнәри белем бирү учреждениеләренең 45 студенты һәм курсанты, шулай ук урта һөнәри белем бирү учреждениеләренең 10 укучысы бүләкләнгән.

"Кешене гомере буе студент еллары, дуслары, аралашуы турында хатирәләр озата бара, - дип ассызыклады Минтимер Шәймиев стипендиатларга мөрәҗәгать итеп. - Бу - гаҗәеп чор". Ул Казан Кремлендәге быелгы очрашуның дүртенчесе булуын әйтте. "Илебез беренче тапкыр шәхескә үз сәләтенчә эшләү өчен мөмкинлекләр тудырып, демократик үсеш юлына басты, - дип билгеләп үтте республика башлыгы. - Сезнең кебек уңышка ирешкән егетләр-кызлар, кызганычка каршы, 100 процент түгел. Тырышлыгыгыз, хезмәтегез ярдәмендә сез үзегез өйрәнә торган өлкәләрне тирәнрәк аңлыйсыз - ә бу зур бәхет. Киләчәктә дә шулай булачагына шикләнмим".

М.Шәймиев сүзләренә караганда, хәзерге вакытта Татарстан икътисады кичергән иң зур кытлык - югары квалификацияле кадрлар. "100 процент белемле җәмгыятебез, мәктәп, югары һәм академия белеменнән гыйбарәт мәгариф системасы булып та, дөньяның ачыклыгы шартларында безнең бүгенге көндә көндәшлеккә сәләтлелегебез тиешенчә түгел. Бу - бүгенге проблема, - дип ассызыклады ТР Президенты. - Без сезгә өмет баглыйбыз". Ул чын күңелдән очрашуга килгән һәм шулай ук барлык Татарстан студентларын бәйрәмнәре белән котлады, югары, урта махсус уку йортлары, мәктәп мөгаллимнәренә хезмәтләре өчен рәхмәт белдерде.

Традиция буенча республика башлыгы очрашуда катнашкан Татьяналарга, шул исәптән стипендиаткалар Татьяна Әхмәтова һәм Татьяна Антоновага, шулай ук ТР Президентының социаль мәсьәләләр буенча дәүләт киңәшчесе Татьяна Ларионовага чәчәкләр тапшырды.
Чара барышында шулай ук 2006-2007 еллар нәтиҗәләре буенча М.Җәлил исемендәге Республика премиясе лауреатларын хөрмәтләү булды. Премияләр "Саташу" спектакле өчен Чаллы дәүләт татар драма театрына, "Йолдызлык" ачык республика телевизион яшьләр эстрада сәнгате фестивале проектына, "Алтын чәч" график әсәрләр циклы өчен рәссам Булат Гыйльвановка, "Төнге әверелеш" шигъри җыентыгы өчен Газинур Моратка, "Кояшны кочкан малай" исемле балалар китабы өчен Ләбиб Леронга бирелде.