М.Шәймиев федераль түрәләр белән Татарстанның оборона сәнәгате перспективаларын тикшерде

17 мартта Казан Кремлендә ТР Президенты Минтимер Шәймиев Россия Федерациясе сәнәгать һәм энергетика министры урынбасары Денис Мантуров, Федераль сәнәгать агентлыгы башлыгы Андрей Дутов һәм "Оборонпром" берләшкән сәнәгать корпорациясе" ААҖ генераль директоры Андрей Реус белән очрашты. Бу хакта республика Президентының матбугат хезмәте хәбәр итә.

Әңгәмә барышында республиканың "Серго исемендәге завод" җитештерү берләшмәсе, "Казан вертолет заводы" ААҖ, "Горбунов исемендәге КАПО" ААҖ, Казан дәүләт казна дары заводы, "Казан төгәл машиналар төзү заводы" ФДУПне үстерү мәсьәләләре каралды.

Минтимер Шәймиев соңгы елларда республикада сәнәгый җитештерүнең нәтиҗәле үсешен билгеләп үтеп, хәзерге таләпләргә туры килә торган техник кадрлар әзерләүне беренчел бурыч, дип атады. Шул уңайдан ул Татарстанда гомумбелем бирү, урат һәм югары һөнәри уку йортларын турыдан-туры сәнәгый предприятиеләр белән бәйләүче белем бирү кластеры төзелүен белдерде. Очрашуда шулай ук югарыда аталган предприятиеләрнең эшчәнлеген исәпкә алып, фәннең сәнәгый җитештерүгә интеграциясе перспективалары каралды.

Әңгәмә ахырында Татарстан башлыгы федераль хөкүмәт вәкилләренә актив һәм нәтиҗәле хезмәттәшлек өчен рәхмәт әйтеп, федераль һәм республика хакимият органнарының сәнәгать тармагындагы бурычларда һәм максатларда фикерләре уртак булуына игътибар итте. "Без барыбыз да Россия Федерациясенең оборонага сәләтлелеген алга таба ныгытуга юнәлтелгән уртак эшне башкарабыз", - диде ул.

Очрашуда шулай ук ТР Премьер-министры Рөстәм Миңнеханов һәм башка рәсми затлар катнашты.