15 майда Хәйрия эшчәнлеге мәсьәләләре буенча республика советы утырышы узды

15 майда Казан Кремлендә, Татарстан Республикасы Президенты Минтимер Шәймиев рәислегендә, Хәйрия эшчәнлеге мәсьәләләре буенча республика советы утырышы узды. Аның эшендә ТР Дәүләт Советы Рәисе Фәрит Мөхәммәтшин, ТР Премьер-министрының беренче урынбасары Равил Моратов, ТР Президенты каршындагы социаль мәсьәләләр буенча дәүләт киңәшчесе Татьяна Ларионова, республика министрлык һәм ведомство җитәкчеләре, муниципаль берәмлек, иҗтимагый оешма вәкилләре, күренекле хәйриячеләр катнашты.

Киңәшмәнең көн кадагына, "Балаларда һәм яшьләрдә изгелек һәм шәфкать хисләре тәрбияләүдә гаилә һәм дәүләтнең социаль партнерлыгы" һәм "Гаилә елы идеясен алга сөргәндә мәгълүмати киңлекнең формалашуы" мәсьәләләре куелды. Беренче сорау буенча төп доклад белән РФ Дәүләт Думасы депутаты, Дәүләт Думасының аграр мәсьәләләр буенча Рәисенең беренче урынбасары Айрат Хәйруллин хисап тотты. Үз гаиләсенә тәрбиягә алынган балалар турында, Казанда яшәүче мәрхәмәтле ана Татьяна Степанова, гаилә табибларының әһәмияте хакында Тәтеш районы Олы Тархан участок хастаханәсенең гомуми практика табибы Ләлә Рәхмәтуллина чыгыш ясады. Массакүләм мәгълүмат чараларының Гаилә елын ни рәвешле яктыртуы турында мәгълүматны "Татмедиа" гаммәви коммуникацияләр агентлыгы генераль директоры Марат Моратов җиткерде. Бүгенге утырышта шулай ук "Изгелек өчен игелек" республика журналистлар конкурсы җиңүчеләре дә тәбрикләнде.

Минтимер Шәймиев утырышны ачып җибәреп, бүген Халыкара Гаилә көне булуын искәртеп узды. Президент иң элек, Татарстанда күптән көтелгән яңгырларның әһәмиятенә тукталды. "Апрель, ярты май буе тамчы да яңгыр күрмәгән идек. Ниһаять, укыган догаларыбыз кабул булды. Аллаһы Тәгалә җир эше белән мәшгуль авыл хезмәтчәннәренең тырышлыгына яңгыры белән ярдәм итә", - ди республика башлыгы.

Аннан соң ул, узган ел ахырында Хәйрия елының дәвамы буларак, Гаилә елына старт бирелүен билгеләп узды. "Былтыр совет эшчәнлегендә бай тәҗрибә тупланды, Гаилә елында да совет составы үзгәрешсез калды", - ди Президент. "Иң мөһиме, Гаилә елы кысаларында нәтиҗәле эш алып барыла, гаиләнең әһәмиятен, аның җәмгыятьнең аерылгысыз бер өлеше булуын ачык аңлыйбыз. Россия Президенты вәкаләтләренә Дмитрий Медведев керешкәннән соң, беренче эшлекле киңәшмәләрдә үк ул социаль өлкәгә җитди игътибарын күрсәтте. Владимир Путин белән бертавыштан социаль ярдәмнең мөһимлегенә басым ясала. Социаль ярдәм канаты астына бүген һаман да күбрәк халык катламнары алына, моңа бәйле рәвештә тулы дәүләт сәясәте формалаша", - дип белдерде Илбашы.