Минтимер Шәймиев Кытай Халык Республикасының Шаньдун провинциясе делегациясе белән очрашты

16 майда Татарстан Республикасы Президенты Минтимер Шәймиев Казан Кремлендә Кытай Халык Республикасының Шаньдун провинциясе делегациясе белән очрашты.

Очрашуда ТР Премьер-министрының беренче урынбасары Равил Моратов, ТР Президенты каршындагы халыкара мәсьәләләр буенча дәүләт киңәшчесе - Тышкы элемтәләр департаменты директоры Тимур Акулов, ТР Сәнәгать һәм сәүдә министры Александр Когогин, Казан дәүләт университеты ректоры, ТР югары уку йортлары ректорлары советы рәисе Мәгъзүм Сәлахов, ТР Яшьләр эшләре, спорт һәм туризм министрының беренче урынбасары Йосыф Якупов, Шаньдун провинциясенең беренче вице-губернаторы Ван Жэньюань, провинциянең Халык хөкүмәте секретариаты башлыгы урынбасары Чжан Чаочао, провинциянең үсеш һәм реформа буенча комитет башлыгы Фэй Юньлян, провинциянең кадрлар департаменты башлыгы Цзяо Ляньхэ һәм башкалар катнашты.

Делегация 14-16 май көннәрендә ТР Сәнәгать һәм сәүдә министры, ТР Премьер-министры белән очрашкан, КДУ да, Казан вертолет заводында булган. Кол Шәриф мәчетен һәм Благовещенский соборын карап узган. Эшлекле сәфәр кысаларында ТР Хөкүмәте һәм Шаньдун провинциясе арасында сәүдә-икътисади һәм фәнни-техник хезмәттәшлек өлкәсендә килешү төзелгән.
"Бөек илнең абруйлы делегациясе белән очрашуыма бик шатмын. Күпмилләтле республика халкы, Татарстан Хөкүмәте исеменнән, Кытайда булган аянычлы хәл уңаеннан кайгыгызны уртаклашабыз. Без ярдәм һәм коткару эшләре артыннан җентекләп күзәттек. Кызганычка каршы, табигатьтә була торган гадәттән тыш хәлләрне булдырмый калу, бездән тормый, иң мөһиме, мондый вакытта кулдан килгәннең барысын да эшләргә тыршырга кирәк. Чөнки һәр кешенең гомере бер генә", - дип, Минтимер Шәймиев фаҗига корбаннарының якыннарына сабырлык теләде.

Президент Кытай Халык Республикасы һәм Татарстан арасындагы хезмәттәшлеккә күзәтү ясады.
ТР һәм КХР арасындагы тышкы сәүдә әйләнеше, 2006 ел белән чагыштырганда, 2,2 тапкыр үсеп, 262,9 миллион АКШ долларын тәшкил иткән.