М.Шәймиев: "Ватаным Татарстан" гомер-гомергә Татарстаныбызга, аның халкына хезмәт итте"

17 май көнне Татарстан Республикасы Президенты Минтимер Шәймиев шушы көннәрдә 90 еллык юбилеен билгеләп үтүче "Ватаным Татарстан" газетасы редакциясендә кунакта булды. Рәсми "Ватаным Татарстан" газетасының беренче саны 1918 елның 12 нче мартында дөнья күргән.

Бүген "Ватаным Татарстан" газетасы редакциясе коллективы белән очрашуда шулай ук газетаның баш редакторы Миңназыйм Сәфәров, ТР Дәүләт Советы рәисе урынбасары, ТР Журналистлар берлеге рәисе Римма Ратникова, "Татмедиа" агентлыгы генераль директоры Марат Моратов, "Идел-пресс" нәшрият-полиграфия комплексы җитәкчесе Ислам Әхмәтҗанов катнашты.

Президент, очрашу башланганчы, редакция һәм журналистларның эш урыннары белән танышып чыкты.
М.Шәймиев редакция коллективын Хөкүмәт, Дәүләт Советы исеменнән газетаның киләчәк юбилее белән котлап, армый-талмый эшләүләрен теләде. Аларның зур миссия башкаруларын ассызыклап: "Булганның кадерен белергә, шуны югалтмыйча алып барырга кирәк", - дип белдерде.

Президент: "Сез халыкның ышанычын күп еллар дәвамында аклыйсыз һәм акларга тиешсез дә. 90 ел гомер аз түгел. Газета нинди генә исемдә чыкмасын, "Ватаным Татарстан" гомер-гомергә Татарстаныбызга, аның халкына хезмәт итәчәк", - дип билгеләп үтте.
"Сүз рәсми газета турында барганда, халыкның бу газетага ихтыяҗы барлыгын әйтергә кирәк. Сез безнең сәясәтне шушы газета аша уздырасыз", - дип мөрәҗәгать итте Президент, редакция коллективына.

Минтимер Шәймиев сүзләренә караганда, газета милли сәнгать, әдәбият һәм дини мәсьәләләрен, тормышны белеп, нигездә яктыртып бара. Ә боларны укучыларга җиткерә белү - зур сәләт, дип саный Илбашы. "Заман да, җәмгыять тә үзгәрде. Без чынбарлыкны исәпкә алып эш итәргә тиеш", - дип белдерде Президент һәм газетаның тиражын саклап калу мәсьәләсен күтәрде.
"Заман үзгәрсә дә, тиражны үстерү өстендә эшләргә кирәк", - диде М.Шәймиев, Р.Ратниковага һәм М.Моратовка бу юнәлештә активрак булырга киңәш итеп. Президент шулай ук газета таратуның төрле ысулларын кулланырга чакырды.

М.Шәймиев очрашу вакытында редакция журналистлары газетага яздыруда административ ресурсларны файдалану, зур җитештерү оешмалары белән эшчәнлекне көчәйтү, халыкның аерым категорияләренә газетаны төрле министрлык һәм ведомстволар аша тарату мәсьәләләрен күтәрде.
Президент бу нисбәттән: "Аерым категория гражданнарга "Ватаным Татарстан" һәм "Республика Татарстан" газеталары барып җитсен өчен, без булыша алабыз. Аны ничегрәк тормышка ашыру турында уйларга кирәк. Бу хакта газетаны гамәлгә куючылар да уйларга тиеш. Монда борчылып кына калмыйча, конкрет адымнар ясарга кирәк. Әйдәгез, газетаның юбилеен яхшы тираж белән билгеләп үтәбез", - диде М.Шәймиев һәм очрашуда катнашучыларга мөрәҗәгать итеп, газетаның тиражын үстерүгә һәм таратуга юнәлтелгән концепция төзергә йөкләмә бирде. Билгеле булганча, "Ватаным Татарстан" газетасының гамәлгә куючылары булып ТР Министрлар Кабинеты һәм ТР Дәүләт Советы тора. Соңгы елларда Милли тираж хезмәте ел саен газетаны "Милли телдәге басма" номинациясендә иң яхшысы дип билгеләп үтә. Бу елның февраль аенда "Ватаным Татарстан" газетасы "Матбугатның алтын фонды" билгесе белән бүләкләнде. Бүген очрашу ахырында М.Шәймиев "Ватаным Татарстан" редакциясе коллективына Президентның Рәхмәт хатын тапшырды.