М.Шәймиев: "Хәрби бурычны үтәүнең намус эше булуы мөһим"

16 июньдә Казан Кремлендә РФ Оборона министрлыгының "Россия Федерациясе төбәкләре арасында РФ гражданнарын хәрби хезмәткә әзерләү, хәрби хезмәткә чакыруны оештыру һәм уздыру буенча иң яхшы эш алып баруга конкурста җиңүчегә" күчмә вымпелын тапшыру тантанасы булды. РФ Кораллы көчләре Генераль штабының Баш оештыру-мобилизация идарәсе башлыгы генерал-полковник Василий Смирнов ТР Президенты Минтимер Шәймиевка вымпелны: "Ул озак елларга Татарстанда калсын", - дигән сүзләр белән тапшырды.

Сигезенче тапкыр уздырыла торган конкурс нәтиҗәләре турындагы боерыкка РФ оборона министры бер ай элек кул куйган.

Республика Президенты залдагыларның барысын да хезмәтләрен шулай югары бәяләүләре белән котлады һәм Татарстан Хөкүмәтенә, аерым алганда бу юнәлеш өчен җаваплы ТР Премьер-министрының беренче урынбасары Равил Моратовка, ТР хәрби комиссары Сергей Погодинга, республика шәһәрләре һәм районнары башлыкларына, министрлык һәм ведомство җитәкчеләренә, бөтен мәгариф системасы вәкилләренә рәхмәт белдерде.

"Әгәр без җиңү яулаганбыз икән, димәк, булдырабыз, - дип билгеләп үтте республика башлыгы. Сүз теләк турында гына түгел, ә бәлки бурыч турында бара. Ватанга хезмәт итү бурычы хакында. Хәрби бурычны үтәүнең намус эше булуы мөһим. Бу хис кешене гомере буе озатып барырга тиеш".

"Гражданинны хәрби хезмәткә әзерләү мәктәп эскәмиясеннән башланырга, хәрби-патриотик, хәрби-техник тәрбия бөтен белем бирү процессы дәвамында тиешле дәрәҗәгә куелырга тиеш, - дип ассызыклады ТР Президенты. - Без кешедә ватанга хезмәт итүе өчен горурлык хисе тәрбияләргә тиеш".
ТР Президенты кыен вакытлар булса да, республикада барлык хәрби вузларын саклап калуга ирешүне билгеләп үтте. "Дәүләт, Оборона министрлыгы, Генераль штаб тарафыннан омтылыш булса, без хәрби училищеларга заманча уку базасын, киләчәк көнне тәэмин итү өчен бөтен инфраструктураны төзергә әзер. Бу процесс котылгысыз дип саныйм, - диде Минтимер Шәймиев һәм республика территориясендә РФ Оборона министрлыгының уку үзәген төзергә тәкъдим итте. - Бездә территория, омтылыш, укытучылар бар. Бу мәсьәләне хәл итүне озакка сузарга ярамый".

РФ Кораллы көчләре Генераль штабының Баш оештыру-мобилизация идарәсе башлыгы генерал-полковник Василий Смирнов: "Быел ышанычлы төстә җиңү яулаган һәм бик көчле көндәшләре - Краснодар крае белән Белгород өлкәсен артта калдырган лидерны хөрмәтләвебез аеруча күңелле. Татарстанның хәрби хезмәткә әзерләү, хәрби хезмәткә чакыруны оештыру һәм уздыру буенча башкарган эшләрендә югары күрсәткечләр республикада нәтиҗәле система төзүне дәлилли. Сезнең күп кенә башлангычларыгыз алдынгы санала һәм алар, һичшиксез, РФнең башка субъектларында җәелдереләчәк. Сездә патриотик тәрбиянең үз хокукый базасы эшләнгән, анда бу процессны камилләштерүнең төп юнәлешләре, үсеш перспективалары билгеләнгән. Ә патриотик тәрбиянең стратегиясен һәм төп юнәлешләрен ТР Президенты Минтимер Шәймиев һәм куратор - беренче вице-премьер Равил Моратов тәгаенли", - диде.

Хөкүмәт һәм Оборона министрлыгы карары нигезендә, генерал-полковник Смирнов М.Шәймиевка вымпел һәм РФ Премьер-министры Владимир Путин имзалаган Мактау грамотасын, акчалата премияне тапшырды. Минтимер Шәймиев премияне Тәтеш кадетлар мәктәбенә тапшырды.
РФ оборона министры боерыгы буенча, Мактау грамотасы һәм акчалата премия белән шулай ук - ТР Премьер-министры Рөстәм Миңнеханов, кыйммәтле бүләк белән - Премьер-министрның беренче урынбасары Равил Моратов бүләкләнде.

"Хәрби бердәмлекне ныгыту өчен" медале, РФ Оборона министрлыгы, РФ Кораллы көчләренең Генераль штабы Мактау грамоталары белән министрлар, министр урынбасарлары, муниципаль район башлыклары, ТР хәрби комиссариаты вәкилләре бүләкләнде.
Аннары ТР Президенты "Фидакарь хезмәт өчен", "Казанның 1000 еллыгы истәлегенә" медальләрен, рәхмәт хатларын тапшырды.

Бүләкләү тантанасын төгәлләп, ТР хәрби комиссары Сергей Погодин тантанадагыларны чираттагы хәрби званиеләп бирелү белән котлады һәм погоннар тапшырды.