Минтимер Шәймиев: "Мәгълүматка хокук һәм сүз иреге - иң мөһим кыйммәтләр"

14 июнь көнне Татарстан Президенты Минтимер Шәймиев Казан Кремлендә X Бөтендөнья рус матбугаты конгрессында катнашучылар белән очрашты. Казанга дөньяның 31 иленнән рус телендә иҗат итүче гаммәви мәгълүмат чараларының 77 җитәкчесе һәм журналисты килгән иде.

Искәртеп үтәбез, X Бөтендөнья рус матбугаты конгрессы Мәскәүдә 10-13 июньдә узды. Анда дөньяның 65 иленнән 1000нән артык гаммәви мәгълүмат чарасы вәкиле катнашты. 11 июньдә форумда Россия Федерациясе Президенты Дмитрий Медведев чыгыш ясады.

"Мәскәүдәге нәтиҗәле эшегездән соң, көнчыгышка юл алып Казанга килүегез өчен рәхмәт белдерәм. Сез дөньяның төрле шәһәрләрендә конгресслар уздырасыз һәм шушы форумнар аша элемтәләр урнаштырасыз, бу сезнең өчен дә файдалы, ә иң мөһиме - сез Россия белән багланышларын өзмисез. Сезнең вазифагыз бик гуманлы, чөнки кешеләр кайда гына яшәмәсен, алар туган телләрен һәм традицияләрен сагына", - дип билгеләп үтте Минтимер Шәймиев сәламләү сүзендә.

Аның сүзләренә караганда, ачык дөнья шартларында мәгълүматка кытлык юк, техник мөмкинлекләр дөньяның иң ерак почмаклары белән мәгълүмат алмашырга мөмкинлек бирә. Мәгълүматка хокук һәм сүз иреге - иң мөһим кыйммәтләр.

"Татарстан гареб белән шәрык кисешкән, ике мәдәният бер-берсен баеткан һәм аларның традицияләре бер-берсенә үрелеп барган урында урнашкан. Милли традицияләр дә саклана - июнь дәвамында без Сабан туен бәйрәм итәбез. Сабан бәйрәме республика чикләреннән чыгып, интернациональ бәйрәмгә әверелде", - диде республика башлыгы.

Аның сүзләренә караганда, Татарстанда бөтен халык Раштуаны, Корбан бәйрәмен билгеләп уза. Рус Никольское авылында элек-электән Каравон бәйрәме уздырыла. 2003 елда бу халык бәйрәме республика күләмендә уздырыла башлады.

Татарстан Президенты күп милләтле һәм күп дине республиканың татулыкта яшәвен аерым билгеләп үтте. Башка халыкларга да, үз халкыңа кебек ихтирам белән карау зарур. Бу - үзара аңлашуның нигезе. Татулык ышаныч булмаганда җимерелә.

ТР Президенты конгресста катнашучыларга Татарстанның социаль-икътисади күрсәткечләре турында да сөйләде.