Минтимер Шәймиев Чаллыда "Евромедик" Халыкара Амбулатор Диализ үзәге белән танышты

12 августта Татарстан Президенты Минтимер Шәймиевнең республиканың Чаллы шәһәренә эшлекле сәфәре сәламәтлек саклау өлкәсенә багышланды. Президентны РФ Дәүләт Думасы Рәисенең беренче урынбасары Олег Морозов, Чаллы шәһәре мэры Илдар Халиков, ТР Сәламәтлек саклау министры Айрат Фәррахов, ТР Президенты каршындагы социаль мәсьәләләр буенча дәүләт киңәшчесе Татьяна Ларионова һәм башкалар озатып йөрде.

Иң элек Минтимер Шәймиев Халыкара Амбулатор Диализ үзәгенең Чаллы шәһәрендәге "Евромедик" исемле филиалында булды. Үзәк 2004 елның 1нче апрелендә ТР Сәламәтлек саклау министрлыгы үткәргән тендер нәтиҗәсендә ачылган. Биредә 4 сменалык эшне күздә тотканда, 216 пациентны кабул итәргә мөмкин булачак. Хәзерге вакытта үзәктә хроник бөер җитешсезлегеннән интегүче 153 пациент гемодиализ дәвалануын уза. Дәвалау җиһазлары кыйбат булса да, биредә халыкка хезмәт бушлай нигездә күрсәтелә. Үзәктә Алманиядә эшләнгән 27 ясалма бөер аппараты бар.

Учреждениедә авырулар өчен барлык уңайлы шартлар тудырылган, капиталь ремонт һәм реконструкция үткәрелгән.
"Евромедик" Халыкара Амбулатор Диализ үзәгендә Чаллы һәм якындагы 10 район халкына хезмәт күрсәтелә. Проектның бәясе 3,8 миллион евроны тәшкил итә. Үзәкнең җитәкчесе Дмитрий Назаров мактаулы кунакларга төп эш юнәлешләрен тәкъдир итте.

Минтимер Шәймиев учреждение белән танышу барышында, бина салынган урынның бик матур һәм кулай булуын билгеләп узды. Дмитрий Назаров сүзләреннән аңлашылганча, биредә табиблар пациентның авыруы дәрәҗәсеннән чыгып, махсус программа билгелиләр. Авырулар айга өч тапкыр кабул ителә.