Минтимер Шәймиев: "Террорчылыкны профилактикалауда иң мөһиме - халык белән эшләү"

8 август көнне Казан Кремлендә Татарстан Республикасы Президенты Минтимер Шәймиев рәислегендә, ТР Террорчылыкка каршы комиссия утырышы узды. Көн тәртибенә "2009-2011 елларда ТР да экстремизмны һәм террорчылыкны профилактикалау буенча республика максатчан программасы" проектын карау мәсьәләсе куелды.

Утырышта ТР Куркынычсызлык советы секретаре Венер Сәлимов, ТР Террорчылыкка каршы комиссия рәисе урынбасары - РФ Федераль куркынычсызлык хезмәтенең Татарстан идарәсе башлыгы Евгений Вдовин, республика Хөкүмәте әгъзалары, хокук саклау органнары, көч ведомстволары җитәкчеләре һәм башкалар катнашты.

"Кызганычка каршы, дөньяда террорчылык күренешләре юк дип әйтеп булмый. Террорчылыкны профилактикалау мәсьәләсен күтәрүебез бик вакытлы. Универсиаданы кабул итәргә җыенуыбыз белән бәйле рәвештә, безнең өчен бу мәсьәлә бигрәк тә мөһим. Без барлык өлкәләрдә дә күләмле агарту эшләре алып барырга бурычлы. Бу мәсьәләне гадиләштерергә ярамый", - дип башлады кереш сүзен Минтимер Шәймиев. Аның сүзләреннән аңлашылганча, 2011 елда, бәлкем иртәрәк тә, безгә Универсиадага әзерлек белән бәйле рәвештә, экстремизмны һәм террорчылыкны профилактикалау буенча тагын да җитдирәк программалар әзерләргә туры киләчәк. "Без бу мәсьәләне федераль террорчылыкка каршы комиссия алдында да куячакбыз", - ди Президент.

"2013 елгы Универсиаданы үткәрү өчен объектлар төзелеше барышында, даими контроль булырга, үз халкыбыз һәм кунаклар күпләп җыелачак урыннарны җентекләп тикшерү зарур", - дип ассызыклый Минтимер Шәймиев.

Аның әйтүенчә, Казанның 1000 еллыгына әзерләнгәндә, хокук саклау органнары вәзгыятьне алдан күреп эш итүгә иреште, тынычлыкны саклады. "Бер әйбер дә игътибар үзәгеннән читтә калырга тиеш түгел. Әгәр без Универсиаданы үткәрү юлын сайлаганбыз икән, әзерлек барышында сакчыл һәм зирәк эш таләп ителә. Бөтендөнья студент уеннарының, дөньяның барлык почмагыннан киләчәк вәкилләр катнашында узачак вакыйга булуын истә тоту зарур. Экстремизмны һәм террорчылыкны профилактикалау эшен башкарып чыга алырбыз дип уйлыйм, хокук саклау структураларының да тәҗрибәсе зур ышаныч уята. Бу эштә иң мөһиме - халык белән элемтәдә тору", - ди Минтимер Шәймиев.

Утырышта "2009-2011 елларда ТР да экстремизмны һәм террорчылыкны профилактикалау буенча республика максатчан программасы" проекты турындагы доклад белән ТР Террорчылыкка каршы комиссия рәисе урынбасары - Федераль куркынычсызлык хезмәтенең Татарстан идарәсе җитәкчесе Евгений Вдовин чыгыш ясады.