М.Шәймиев Пекиндагы Олимпиадада призлы урыннар яулаган Татарстан спортчыларын котлады

Татарстан Президенты Минтимер Шәймиев Пекинда узучы Олимпиадада каршылыклар аша 3000 метрга йөгерүдә алтын һәм бронза медальләр яулаган Татарстан җиңел атлетлары - Гөлнара Галкина-Сәмитова һәм Екатерина Волкованы тәбрикләде. 

Чаллы спортчысы Гөлнара Галкина-Сәмитова Пекинда узучы Олимпиадада каршылыклар аша 3000 метрга йөгерүдә дөнья рекорды куйды һәм алтын медаль яулады. Ул 2004 елда үзе үк куйган рекордын 3 секундка диярлек узып китте. Аның нәтиҗәсе - 8.58,81.

Татарстанның тагын бер вәкиле - 2007 елда дөнья чемпионы булган Түбән Кама җиңел атлеты Екатерина Волкова бронза медальгә лаек булды.

ТР Президенты Гөлнара Галкина-Сәмитовага котлау телеграммасы җибәрде, анда мондый юллар бар: "Татарстан халкы исеменнән Сезне Пекинда узучы Олимпиадада җиңүегез белән чын күңелдән тәбриклим. Үз көндәшләрегезгә бернинди дә өмет калдырмыйча яңа дөнья рекорды куюыгыз Сезнең зур осталыкка ия булуыгызны тагын бер мәртәбә раслый. Бу - Татарстан һәм бөтен Россия өчен көтеп алынган җиңү.

Бүген дөнья җиңел атлетика Олимпында Сезгә тиңнәр юк. Сезгә сокланабыз һәм Россиянең Олимпия җыелма командасының алтын копилкасына сизелерлек өлеш керткәнегез өчен рәхмәт белдерәбез. Бу уңышны Сезнең тренерларыгыз - беренче тренер Миңнулла Чинкин, Сезне Олимпиадага әзерләгән Татьяна Сенченко һәм Геннадий Суворов та бүлешә. Без аларга шулай ук бик рәхмәтле. Сезгә чын күңелдән алга таба да спортта һәм тормышта зур уңышларга, куйган максатларыгызга ирешүегезне, яңа җиңүләр теләп калабыз".

Минтимер Шәймиев шулай ук Екатерина Волкованы да уңышы белән котлады, дип хәбәр итә ТР Президентының матбугат хезмәте. Котлау телеграммасында болай диелә: "Барлык татарстанлылар һәм шәхсән үз исемемнән Сезне Пекинда узучы Олимпиадада бронза медаль яулавыгыз белән тәбрик итәм. Бу - Сезнең хезмәт сөючәнлегегез һәм җиңүгә омтылышыгыз өчен лаеклы бүләк, чын спортчының куелган максатка ирешү өчен үзен дә, теләсә нинди каршылыкларны да җиңеп чыга алуына дәлил.

Сезгә искиткеч чыгышыгыз, безгә шатлык бүләк иткәнегез, яшь спортчылар өчен батырлык һәм максатка омтылучанлык үрнәге күрсәткәнегез өчен рәхмәт белдерәбез. Сезнең белән горурланабыз, Сезгә һәм тренерыгыз Василий Мастровка яңадан-яңа уңышлар һәм матур җиңүләр теләп калабыз".