Минтимер Шәймиев һәм Андрей Фурсенко республика педагогларының август киңәшмәсендә катнаша

 21 август Татарстанның Лаеш муниципаль районында ТР мәгариф һәм фән хезмәткәрләренең республика август конференциясе уза. Аның эшендә Татарстан Президенты Минтимер Шәймиев, РФ мәгариф һәм фән министры Андрей Фурсенко, ТР Премьер-министры Рөстәм Миңнеханов, ТР Дәүләт Советы Рәисе урынбасары Александр Гусев, ТР мәгариф һәм фән министры Наил Вәлиев, ТР Президент аппараты, Дәүләт Советы, Министрлар Кабинетының җаваплы хезмәткәрләре, дәүләт хакимияте федераль органнарының территориаль структуралары, министрлык һәм ведомство җитәкчеләре, муниципаль берәмлек башлыклары, фәнни җәмәгатьчелек вәкилләре һәм башкалар катнаша.

Иң элек мәртәбәле кунаклар "Мәгариф" өстенлекле илкүләм проекты кысаларында 1 миллион сум акчалата бүләк алган Столбище урта мәктәбендә булды. Кадетларның сәламләвен кабул иткәч кунаклар уку кабинетларына узды, "Отечество" клубы әгъзалары белән очрашты. Столбище мәктәбендә узган ел капиталь ремонт үткәрелгән. Биредә укучылар саны 391 бала тәшкил итә, барлыгы 65 укытучы белем бирә. Мәктәптә җиһазланган компьютер классы, интернет челтәренә чыгу мөмкинлеге, электрон почта бар.

Алга таба Сокуры бистәсендә рәсми затлар игътибарына азык-төлек әзерләү фабрикасында "Укучыларның мәктәптә туклануы" программасы тәкъдир ителде. Мактаулы кунаклар цехларга үтеп әзер продукцияне татып карады. Сокуры бистәсендәге әлеге муниципаль программа 2008-2011 елларга исәпләнгән.

Пленар утырыш алдыннан мәртәбәле кунаклар махсус әзерләнгән күргәзмә эше белән дә танышты. Биредә аларга "Мәктәп автобуслары" программасының гамәлгә ашырылуы хакында сөйләделәр. Бүгенге көндә республикада барлыгы 265 автобус мәктәп укучыларына хезмәт күрсәтә.

Республика август киңәшмәсе пленар утырышын ТР Премьер-министры Рөстәм Миңнеханов ачып җибәрде.