Татарстан Президенты Минтимер Шәймиевкә - 68 яшь!

Бүген - 20 гыйнварда Татарстан Республикасының беренче Президенты Минтимер Шәриф улы Шәймиевкә 68 яшь тула. Ул республикабызда гына түгел, бөтен Россиядә оста сәясәтче, демократ, үз фикерендә нык торучы кеше буларак билгеле шәхес. "Intertat.ru" республика электрон газетасы коллективы Илбашын гомер бәйрәме белән кайнар котлый, сәламәтлек, гаилә бәхете, озын гомер һәм алга таба да республика рулен шулай ышанычлы тотуын теләп кала.

Минтимер Шәриф улы Шәймиевнең туган көне быел мөселманнарның нурлы Корбан бәйрәме белән туры килде. Бу үзе дә зур мәгънәгә ия. Илбашының исемен этимология ягыннан караганда Ходай тамгалаган кеше дигәнне аңлата. Бер үк вакытта әлеге сүз бәхетле һәм тимердәй нык дигәнне аңлата.

Минтимер Шәриф улы Шәймиев 1937 елның 20 гыйнварында хәзерге Актаныш районы €Әнәк авылында крестьян гаиләсендә туган. Минтимер Шәриповичның әтисе Шәриф (Шәрифулла) ага Шәймиев бөтен гомерен авыл хуҗалыгына багышлый - егерме алты ел буена күмәк хуҗалык рәисе булып эшли. Минтимер Шәрип улының балалык еллары ил өчен гаять кыен сугыш елларына һәм сугыштан соңгы чорга туры килә. Аңарда лидер сыйфатлары балачактан ук күренә башлый.

1954 елда ул мәктәпне тәмамлый һәм Казан авыл хуҗалыгы институтының механика факультетына укырга керә. Студент елларында Павлодар өлкәсендә комбайнчы булып эшли - иген уңышы җыя. 1959 елда институтны тәмамлагач, Мөслим ремонт-техник станциясендә башта инженер, аннары баш инженер булып эшли. 25 яшендә Минзәлә район "Сельхозтехника" берләшмәсе идарәсе рәисе итеп билгеләнә. 1967 елда административ-партия эшенә күчә, башта КПССның Татарстан өлкә комитетында авыл хуҗалыгы бүлеге инструкторы, аннары бүлек мөдире урынбасары булып эшли.

1969 елда Минтимер Шәриф улын республиканың мелиорация һәм су хуҗалыгы министры итеп билгелиләр. Шул чорда республикада мелиорация эшләре активлаша, су сибеп үстерелә торган культуралы көтүлекләр саны арта, ясалма су сиптерүгә нигезләнгән берничә эре яшелчә совхозы төзелә.

1983 елда М.Ш.Шәймиев Татарстан АССР Министрлар Советы Рәисенең беренче урынбасары, аннары ике ел КПССның Татарстан өлкә комитеты секретаре булып эшли. 1985 елда җәмгыятьтә күренә башлаган тирән үзгәрешләрне ул республика лидерларының берсе сыйфатында каршылый: 1985 елдан Татарстан АССР Министрлар Советы Рәисе, ә 1989 елда КПССның Татарстан өлкә комитеты беренче секретаре булып эшли.

1990 елда М.Ш.Шәймиев ТАССР Югары Советы Рәисе итеп сайлана. 1990 ел - республика белән федераль үзәк арасындагы мөнәсәбәтләрнең кискенләшкән елы, Югары Совет тарафыннан Татарстан Республикасының дәүләт суверенитеты турында Декларация кабул ителгән ел. Республиканың яңа статусы республика өчен яңа булган Президентлык институтын төзүне таләп итте. Һәм 1991 елның 12 июнендә, ирекле сайлаулар нәтиҗәсендә, Татарстан Республикасының беренче Президенты итеп Минтимер Шәрип улы Шәймиев сайланды. 1996 елның 24 мартында Һәм 2001 елның 25 мартында ул кабат Татарстан Республикасы Президенты итеп сайланды.

Минтимер Шәриф улы Шәймиев 1994-2001 елларда Россия Федерациясе Федераль җыелышының Федерация советы әгъзасы булдып торды. "Бердәм Россия" партиясе Югары советы рәистәше. Минтимер Шәриф улы Шәймиев Россия Федерациясе Дәүләт советы президиумы әгъзасы; БМО химаялыгында эшләүче Бөтендөнья рыцарьлар конфедерациясе Халыкара парламенты Президиумының мактаулы әгъзасы; Россия Федерациясе Технологик фәннәр академиясе академигы; Россия Федерациясе Тышкы эшләр министрлыгы Мәскәү дәүләт Халыкара мөнәсәбәтләр институтының мактаулы профессоры; Халыкара информатизация академиясенең мактаулы академигы; татар халкының Кол Гали исемендәге Халыкара бүләге лауреаты: җәмәгатьчелек белән элемтәләрне үстерү өлкәсендә журналистлар берлеге, Россия Федерациясе Сәүдә-сәнәгать палатасы һәм җәмәгатьчелек белән элемтәләр буенча Россия ассоциациясе тарафыннан булдырылган "Көмеш Укчы" дигән беренче милли премия лауреаты; 1997-1998 еллар сезоны йомгаклары буенча "Россиянең театр сәнгатенә ярдәм иткән өчен" номинациядә "Алтын битлек" дигән милли театр премиясе лауреаты. 1998 елда Кембриджның (Англия) Халыкара биографик үзәге М.Шәймиевкә "1997/98 ел кешесе" дигән халыкара мактаулы исем бирде. Ул 1966 елда Ленин ордены, 1971 елда Хезмәт Кызыл Байрагы ордены, 1976 елда Октябрь Революциясе ордены, 1987 елда Халыклар дуслыгы ордены, 1997 елда II дәрәҗә "Ватан алдындагы Хезмәтләре өчен" ордены һәм Россия Федерациясе Хөкүмәтенең Мактау Грамотасы, медальләр белән бүләкләнде.