Минтимер Шәймиев: "Энергетика өлкәсен инвестицияләр җәлеп итү аша үстерергә кирәк"

1 декабрь көнне Казанда "Энергетика. Ресурсларны саклау" исемле алтынчы халыкара күргәзмә ачылды. Биредә Татарстан һәм Россия оешмалары белән бергә чит ил фирмалары да катнаша. Күргәзмәне ачу тантанасын Татарстан Республикасының Президенты Минтимер Шәймиев башлап җибәрде.

Быелгы күргәзмә кысаларында "Сыйфатлы энергетик системалар һәм яңа технологияләр" исемле бишенче халыкара симпозиум үткәрелә, моннан тыш Дания Корольлеге компанияләрен тәкъдир итү дә оештырылачак. Күргәзмәдә энергетика җиһазаларын һәм махсус приборлар җитештерүче Россия заводлары белән беррәттән чит илдән килгән 11 якын фирманың да булуы мәгълүм. Барлыгы Россиянең башка төбәкләреннән килгән вәкиләр белән бергә 170 якын оешма катнаша, шуларның 70 - Татарстаннан.

"Бүгенге көндә республиканың энергетика өлкәсендә ирешкән уңышларның күбесе оештыру моментларын чагылдыру, билгеле бер ситема булдыру кебек күзаллана. Киләчәктә энергетика өлкәсен инвестицияләр җәлеп итү аша үстерергә кирәк, безнең оешмаларыбыз көндәшлек итәрлек булып танылырга тиеш", - диде Татарстан Республикасының Президенты Минтимер Шәймиев. Ел саен үткәрелә торган симпозиумнар киләчәктә чит илләр белән үзара икътисадый багланышларны үстерүгә зур этәргеч булып тора. Президентның сүзләренә караганда, илдә барган үзгәрешләрне барлау, алар белән турыдан-туры танышу мөмкинлеге биргән мондый фикер алышулар уңай күренеш буларак бәяләнергә тиеш.

Күргәзмәне ачу тантанасында Дания Корольлегенең Россия Федерациясендәге тулы вәкаләтле вәкиле Ларс Виссинг та катнашты. Дания һәм Татарстан арасындагы икътисадый багланышларның үсеш юлын билгеләп үткәннән соң ул бүген хезмәттәшлекнең икенче этабы башлануын билгеләп үтте.

Күргәзмәне ачып җибәргәннән соң Илбашы залда тәкъдим ителгән стендларны карап чыкты. Кунаклар арасында Татарстан Республикасының Премьер-министры Рөстәм Миңнеханов, ТР сәүдә һәм тышкы икътисадый хезмәттәшлек министры Хафиз Салихов, эре оешма җитәкчеләре һәм башка рәсми затлар бар иде.