М.Шәймиев: "Төбәкара хезмәттәшлек мөмкинлекләрен кулдан ычкындырырга ярамый"

Бүген Татарстан Президенты Минтимер Шәймиев Һиндстан Республикасының Россия Федерациясендәге Гадәттән тыш һәм Вәкаләтле Вәкиле Канвал Сибал җитәкчелегендәге делегацияне кабул итте.

Очрашуда Татарстан ягыннан ТР Президенты Аппараты җитәкчесе Экзам Гобәйдуллин, Президентның халыкара мәсьәләләр буенча киңәшчесе Тимур Акулов, сәүдә һәм тышкы икътисади хезмәттәшлек министры Хафиз Салихов, Казан хакимияте башлыгы урынбасары Фәрит Ишмаков катнашты.

Канвал Сибал күп еллар туган иленең төрле илләрдәге вәкиле булып хезмәт иткән кеше, Россиядәге Вәкиллеккә ул быелның сентябрь аенда гына билгеләнде. Татарстанга да беренче килүе. Билгеле булганча, кичә К.Сибал җитәкләгән делегация ТР Сәүдә министрлыгында эшмәкәрлеккә багышланган түгәрәк өстәлдә катнашты, Казан белән танышты. Бүген исә Казан мэры Камил Исхаков янында, Казан вертолет заводында булды. Президент белән очрашудан соң кире Мәскәүгә киткәнче, делегация "Эшмәкәрлеккә теләктәшлек итү татар институты" идарә Академиясен дә карыячак.

Минтимер Шәймиев Һиндстан вәкиленә вакыт табып, Татарстанга килүе өчен рәхмәтен белдерде. "Ике илнең дә хезмәттәшлекне арттырырга көченнән килә, булган сөйләшү һәм килешүләрне киңәйтергә һәм үстерергә кирәк", - диде Президент очрашуда. "Россия белән Һиндстан арасында төбәкара хезмәттәшлек алып бару мөмкинлеге ачылды, шуңа күрә аны кулдан ычкындырырга ярамый, чөнки Татарстан Россиядә сәнәгать өлкәсендә әйдәп баручы төбәкләрнең берсе", - дип ассызыклады М.Шәймиев.

Россия белән Һиндстан арасындагы хезмәттәшлек 1947 елларга барып тоташа. Россия Президенты Владимир Путин да 2000, 2002 елларда Һиндстанда булып кайтты. Илбашының чираттагы рәсми визиты исә быелның декабрь аена планлаштырылган.

2000 елда кул куелган Россия белән Һиндстан арасындагы төбәкара хезәттәшлек турындагы Килешү нигезендә, бүгенге көндә Әстерхан өлкәсе белән Һиндстанның Гуджарат штаты, Самара өлкәсе белән Карнатака штаты һәм Казан белән Хайдарабад, Татарстан Республикасы белән Андхра-Прадеш штаты арасында хезмәттәшлек беркетмәләре төзелгән. Соңгы елдагы нәтиҗәләр буенча, Һиндстан Татарстанның тышкы сәүдә хезмәттәшелегендә 13-нче урында тора.

Бүгенге очрашуда билгеләп үтелгәнчә, ноябрь урталарында Татарстанстанда яңа төрле һинд чәе сатыла башлаячак - күптән түгел Казанда Татарстан белән Һиндстанның уртак "ТС Компани Лтд" чәй предприятиесе теркәлгән. Бу эштә Татарстан ягыннан "Татпотребсоюз", ә Һиндстан ягыннан "Сараф Трейдинг Корпорейшн прайвет лимитед" компаниясе катнаша. Яңа продукциянең экологик чисталыгы һәм дәвалау сыйфаты тикшерү үткән инде. Әлегә өч төрдәге чәй чыгарылыр дип көтелә - "Лилия", "Колокол" һәм "Ландыш" исемлеләр. Чәй капларында мәгълүмат рус һәм татар телләрендә язылачак.

Канвал Сибал, гомумән бүгенге очрашу белән бик канәгать калуын белдерде. "Президентның Һиндстан белән хезмәттәшлекнең киләчәген анык күрүе бик ошады. Бүген без бергә эшли алырлык барлык проектларны да тикшердек. Президенты Һиндстанга чакырдым, 1998 елдан инде шактый әйберләр үзгәрде", - диде Вәкил журналистларга, Минтимер Шәймиевнең үзләрендә соңгы тапкыр кайчан булуын искә алып.

Канвал Сибал ачыклап киткәнчә, тиздән, инде ноябрьдә, РФ Премьер-министры урыбасары Жуков әфәнденең, аннан соң декабрьдә Владимир Путинның Һиндстанга визиты көтелә. "Шушы очрашулар барышында ике ил арасында хезмәттәшлек күләмен үстерү һәм ныгыту турында сүз барыр дип уйлыйбыз һәм Россия делегациясендә Татарстан Хөкүмәте вәкилләрен дә күрергә телибез", - диде илче.

"Гыйнварда исә бездә энергетикага багышланган Россия-Һиндстан семинары үтәчәк. Нефть һәм нефть химиясе республика икътисадында зур роль уйный, без Татарстан да бу семинарда катнашыр дип өметләнбез", - диде К.Сибал.

Һиндстан илчесе Президент белән шулай ук программа тәэминаты, аеруча аның нефть химиясе өлкәсенә кагылышлы продукцияләре турында сөйләшү булганын әйтте. Һиндстанның шулай ук автомобиль сәнәгате, "КамАЗ" предприятиесе белән дә кызыксынуы зур. Киләсе елның февралендә Һиндстанда үтәчәк техника күргәзмә-ярминәксендә "КамАЗ" автомобильләре дә тәкъдим ителер дип көтелә.

"Без Казан вертолет заводы белән Һиндстанның шәхси компанияләре арасында элемтәләр урнаштыру турында сөйләштек. 2005 ел башында шәхси һинд компанияләре Казанга килер, ә май аенда "Казан ярминкәсе" күргәзмәләр үзәгендә Һиндстанның кече һәм урта эшмәкәрлек күргәзмәсе үтәр дип ниятлибез", - диде Вәкил.

Һиндстан мәдәнияте вәкилләре исә киләсе елда Казанның 1000 яшьлек юбилеена багышланган чараларда катнашырга әзерләнә.