Президент Казакъстанда Татарстан көннәрендә катнаша

28 октябрьдә Татарстан Президенты Минтимер Шаймиев Казакъстан Республикасы Президенты Нурсолтан Назарбаев чакыруы буенча Казакъстан башкаласы Астанага китте.

Татарстанның рәсми делегациясе Казакъстан Республикасында Россия Федерациясе елы кысаларында үтүче Казакъстанда Татарстан Республикасы көннәрендә катнашачак.

Астанада Минтимер Шаймиев Казакъстанның Илбашы Нурсолтан Назарбаев, Премьер-министры Даниал Әхмәтов, Астана башлыгы Умирзак Шукеев белән очрашачак.

Делегация составында - республиканың төрле министрлык һәм идарәчелек җитәкчеләре, «Татнефть», «КамАЗ», «Казан вертолет заводы», «Татэнерго», «Түбән Кама шин» кебек эре предприятие директорлары.

Очрашуда ике яклы хезмәттәшлек мәсьәләләре күтәрелер, аерым алганда, ягу-энергетика комплексы, транспорт һәм коммуникацияләр, төзелеш һәм машина төзелеше өлкәсендә уртак проектлар эшләү өчен ике яклы эшче төркемнәр оештыру турында сөйләшенер дип көтелә. Визит барышында Астана белән Казан арасында хезмәттәшлек турында килешү дә төзеләчәк.

Татарстан Президенты шулай ук Казакъстанның Сәүдә һәм индустрия министрлыгында үтәчәк Татарстан икътисади потенциалын тәкъдир итүдә катнашачак, «АстанаГенПлан» предприятиесендә Астананы үстерү проекты белән танышачак, «Думан» һәм «Байтирәк» мәдәни күңел ачу комплексларын караячак.

Минтимер Шәймиев Казакъстандагы Татар мәдәни үзәкләре ассоциациясе вәкилләре белән дә очрашыр һәм Астана шәһәре Опера театрында Татарстанның сәнгать коллективлары концертында да булыр дип көтелә.

28 октябрь көнне кич Татарстан Президенты кире Казанга кайтачак.