Татарстан Президенты авыл хужалыгы алдынгыларын котлады

8 октябрьдә ТР Президенты Минтимер Шәймиев катнашлыгында Казанның "Пирамида" мәдәни-куңел ачу үзәгендә Татарстан авыл хуҗалыгы һәм эшкәртү сәнәгате тармагы хезмәткәрләре бәйрәме уңаеннан тантаналы кабул итү чарасы узды. Әлеге чарада республиканың авыл хуҗалыгы тармагы хезмәт алдынгылары катнашты.

"Икмәк - икътисад һәм сәясәтнең ышанычлы нигезе. Бүген биредәге залда ватан тотрыклылыгын һәм халкыбызны икмәк белән тәэмин итүчеләр җыелды", - дип олылады Минтимер Шәймиев авыл хуҗалыгы хезмәткәрләрен.

Гомумән алганда, узган авыл хуҗалыгы елы республика күләмендә тотрыклы узды. Агымдагы елның 9 ае нәтиҗәләре буенча Татарстанда авыл хуҗалыгы продукциясе җитештерү күләме 5,6 процентка үскән. Россия күләмендә исә ул 1,5 процентка кимегән.

Республика игенчеләре агымдагы елдагы уракта 4,2 миллион тоннадан артык икмәк җыеп алды. Яңа уңышның 1 миллион тоннага якыны инде сәүдәгә озатылды, 300 мең тонна бодай саклау пунктларына тапшырылды. Хәзерге вакытта игенчеләр басуларда 1,5 миллион тоннага якын шикәр чөгендере җыеп алу эшендә тырыша. Терлекчелек тарамгында ел азагына кадәр 1,5 миллион тонна сөт, 300 мең тонна терлек һәм 40 мең тонна кош ите җитештерү фаразлана.

Икмәк гомер-гомергә ил байлыгы булып исәпләнелде, ә агымдагы елда әлеге байлыкны туплау эшенә иң зур өлешне Нурлат районы игенчеләре кертте. Алар тарафыннан 190 мең тонна икмәк җыеп алынды. Шулай ук, Буа (163 мең тонна), Әлки (151 мең тонна), Актаныш (146 мең тонна), Зәй (127 мең тонна), Балтач (120 мең тонна), Чирмешән (112 мең тонна), Түбән Кама (100 мең тонна) районнары да нәтиҗәле эш башкарды.

Республика игенчеләре агымдагы елда һәр гектардан уртача 27,5 центнер уңыш җыйды. Ә Нурлат районында ул 50,1 ц ентнер, Балтач 42,3 центнерга кадәр җитте. Нурлат районының "Сөлчә" кооперативы исә 73,7 центнер һәм "Синдряков исемендәге" хуҗалык 64,5 центнерга кадәр уңыш алган.

"АИКБ "Татфондбанк" ААҖ, "Кызыл Шәрык" сыра кайнату компаниясе" ААҖ, "Камазернопродукт" ААҖ, "Татарстан сөте" ААҖ һәм башка эре һәм кече компанияләр авыл хуҗалыгы тармагына инвестицияләр ертүне дәвам итәләр. Инвесторлар белән эш итүче авыл хуҗалыгы җитештерүчеләре инде заман технологияләрен файдалануга, яңа җиһазлар белән эш алып баруга күчәләр. Үз чыгышында ТР Президенты Минтимер Шәймиев авыл хуҗалыгы тармагы казанышларын билгеләп узу белән бергә, җитешсезлекләрне дә читтә калдырмады. Яңа уңышларга ирешүдә иң беренче тоткарлык - оештыру җитешсезлеге, дип билгеләде республика башлыгы. Шуны истә тотып, Минтимер Шәймиев район һәм хуҗалык җитәкчеләренә тармакта оештыру эшләренә игътибарны арттыруга тагын бер кат басым ясады.

Сүз азагында ТР Президенты Минтимер Шәймиев ТР Дәүләт Советы, ТР Хөкүмәте һәм үзе исеменнән Татарстан авыл хуҗалыгы һәм эшкәртү сәнәгате хезмәткәрләрен һөнәри бәйрәмнәре белән тәбрикләп узды һәм аларга үзенең киләчәк теләкләрен җиткерде.