ВУЗлар акча санарга өйрәнә

Бүген - Белем көнендә Татарстан Президенты Минтимер Шәймиев Казан дәүләт технология университетында булды. Ул анда бу уку йортының Гыйльми совет утырышында катнашты.

Илбашын ТР Премьер-министры урынбасары, Икътисад һәм сәнәгать министры Алексей Пахомов, Мәгариф министры Рәис Шәйхелисламов, Казан мэры Камил Исхаков, КДТУ ректоры, Президентның фән һәм югары белем буенча киңәшчесе Сергей Дьяконов, республиканың сәнәгать предприятиеләре җитәкчеләр һәм башка рәсми затлар озатып йөрде. Университет алдында оештырылган тамашада студентлар КДТУның Татарстан икътисады һәм җитештерү өлкәсендәге әһәмияте турында бәян итте.

Ректор Гыйльми Совет утырышын ачып җибәреп, сүзне Татарстанның һәм Россиянең атказанган фән эшлеклесе, нефть һәм газны химик эшкәртү кафедрасы профессоры, 50 ел гомерен шушы уку йортына багышлаган Ирек Дияровка бирде. Галим үзе эшләгән вузның нефтьчеләргә йөз белән борылуын билгеләп үтте. Бу тармакта эшләүчеләрнең белемен күтәрү максатыннан "Татнефть" ачык акционерлык җәмгыяте белән берлектә махсус программа эшләнгән. Аның буенча 5 чыгарылыш булган инде. Ирек Дияров бүгенге көндә нефть запасларының кими баруына ишарәләп, табигый битумны эшкәртүнең яңа технологиясе эшләнүен хәбәр итте.

Университетның җиңел сәнәгать институты профессоры Илдар Абдуллин үз чиратында җәнлек тиресен яңа технология ярдәмендә эшкәртү хакында сөйләп китте. Аның фикеренчә, мондый мех күпкә түземлерәк, шул исәптән чит илләрдәге аналоглары белән ярыша алырлык дәрәҗәдә.

Билгеле, һәрбер уйлап табу акча китерергә тиеш. КДТУ ректоры Сергей Дъяконов әйткәнчә, алар хәзер акча санарга өйрәнә башлаган. Быел мондый ачышлар вузга киләчәктә 1 млрд. сум китерәчәк икән. Бу инде университет бюджетына өстәмә керем дигән сүз. Хәзергә исә башыкарылган эшләр 700 млн. сумнан артып китә. КДТУ ректоры алдагы уку елына бурычлар билгеләп һәм Президентның киңәшчесе булуына басым ясап: "Безнең уку йортында нәрсә генә эшләнмәсен, ул Президентыбыз сәясәте чагылышы. Шуңа күрә ул бу сәясәтне яхшы белә һәм мин ул турыда сөйләп тормыйм", - диде. Ректор үз чыгышында фән белән тирәнтен шөгыльләнүләрен, аның һәрвакыт ачышлар белән тәмамланырга тиешлеген студентлар турында кайгыртуларын сөйләп китте. Һәрвакыт хакимият белән килешеп, аңлау табып эшләргә кирәклеген ассызыклады. Дәүләтнең киләчәк буыннар өчен эшләвен билгеләп үтте. ТР Президенты Минтимер Шәймиевнең безнең өчен эшләве турында әйтеп, чыгышын тәмамлады.

ТР Президенты Минтимер Шәймиев Казан дәүләт технология университетының җәмгыятьтә барган үзгәрешләр аркасында югалып калмауларын һәм чыгу юлларын табуларын билгеләп үтте. Аларны Белем көне белән кайнар котлады. "Белем алу процессы һәркемгә кагыла. Гражданнарны укытуга гомерен биргән кеше үсеп килүче буын алдында зур җаваплылык тоя", - диде ул. "Икътисад нигезен белемле кадрлар тәшкил итә. Шуңа күрә бүген югары уку йортларының иртәгә хезмәт куярга сәләтле белгечләр әзерләве мөһим. Шулай итеп, без төп бурычны үтәячәкбез - продукциянең тиңдәшлеккә сәләтле булуына ирешәчәкбез", - диде Президент, киләчәккә бурычлар билгеләп.

Хәзерге вакытта Казан дәүләт технология университеты үз эченә 5 база институты, 11 факультет һәм 58 кафедраны ала. Университет тарафыннан 27 юнәлеш буенча фундаменталь эзләнү һәм гамәли тикшеренүләр алып барыла. Бигрәк тә химия һәм нефтехимия сәнәгатенә зур игътибар бирелә.