Татарстан Президенты Владимир Соколин белән очрашты

31 август көнне Татарстан Президенты Минтимер Шәймиев Казан Кремлендә Россия дәүләт статистикасының федераль хезмәте җитәкчесе Владимир Соколинны кабул итте.

Очрашуда шулай ук ТР Президенты Аппараты җитәкчесе Әкъзам Гобәйдуллин, ТР Президентының социаль-икътисади мәсьәләләр буенча киңәшчесе Марат Сафиуллин, ТР Дәүләт статистика комитеты рәисе Валерий Кондратьев, ТР икътисад һәм сәнәгать министрының беренче урынбасары - Икътисади һәм социаль тикшеренүләр үзәге директоры Алевтина Кудрявцева катнашты.

Татарстан Президенты статистика органнары хезмәткәрләренең эшчәнлегенә югары бәя бирде. "Алар әзерләгән статистика мәгълүматы төбәкләргә бер-берләренең уңышларын игътибар белән күзәтеп барырга ярдәм итә. Әмма кайвакыт мәгълүматлар таркау була, ә безне бөтен Россия күләмендә төбәкләрнең икътисади күрсәткечләре генә түгел, социаль өлкәсе дә кызыксындыра. Татарстан Хөкүмәте үзенең эшчәнлегендә һәрвакыт статистика мәгълүматларына таяна", - дип ассызыклады Президент.

Владимир Соколин үз чиратында Минтимер Шәймиевкә 30 август - Республика һәм Шәһәр көннәре алдыннан Татарстанга чакыруы өчен рәхмәтен белдерде. "Үткән гасырның 90-нчы елларында Татарстан социаль статистика юнәлешен әле-әле үстерә генә башлаган булса, бүгенге көндә бөтен Россия аның тәҗрибәсенә таяна", - диде ул.

"Татарстан Президенты статистика мәсьәләләре белән яхшы таныш. Хөкүмәт, шулай ук Икътисад министрлыгы коллегияләрендә чыгыш ясаганда да Президент мәсьәләләрне кискен итеп куя белә. Бүгенге очрашуда без Татарстан Президенты һәм Хөкүмәте эшчәнлегендә мәгълүмати тәэмин ителеш мәсьәләләре турында сөйләштек", - диде Владимир Соколин.

Очрашуда шулай ук районнар дәрәҗәсендәге статистика, аларның сыйфаты, дөреслеге, кирәклеге һәм тиздән булачак авыл хуҗалыгы санын алу турында да сүз барды. Билгеле булганча, 2006 елда Россиядә беренче тапкыр андый сан алу булачак.