Татарстан Президенты опера һәм балет театрындагы төзекләндерү эшләре белән танышты

Кичә Татарстан Президенты Минтимер Шәймиев башкаланың М.Җәлил исемендәге Татар дәүләт академия опера һәм балет театры бинасындагы төзекләндерү эшләренең барышы белән танышты.

Төзелеш урынына шулай ук ТР Премьер-министры урынбасары Зилә Вәлиева, мәдәният министры Илдус Тарханов, Казан мэры Камил Исхаков һәм башка рәсми затлар да килгән иде. Минтимер Шәймиев Казанның 1000 еллыгына төзекләндерелүче Кремль, опера театры кебек мөһим объектларны игътибарыннан читтә калдырмый. Ремонт барган театрга килгәч тә Президент ODAK төрек компаниясе төзүчеләреннән эш барышы турында сорашты, бинаның тышкы фасады нинди булачагын, холл, тамаша залын, диварларны һәм түбәне бизәп торачак милли бизәкләрне карады. Фасадның тышкы ягына соры төстәге мрамор плитәләр ябыштыруга исә Президент каршы төште, салкын ташны ошатмады.

Төзекләндерү барышы белән танышканнан соң М.Шәймиев монда ук эшлекле киңәшмә дә үткәрде. "Татстрой" ААҖ һәм ODAK төрек компаниясе җитәкчеләре Илбашына эш темплары турында сөйләде. Алар бүгенге көндә култыкса һәм баскычлар өчен мәрмәр плитәләр кайтарту мәсьәләсе хәл ителүен, түбәдәге һәм диварлардагы бизәкләрне алтынга буярга калуын, яктырткычыларның күп өлеше инде эленгәнен әйтте. Төзүчеләр кышка кадәр бинаның тышкы ягын эшләп бетерергә вәгъдә бирде. Алар әйтүенчә, объектны финанслау тотрыклы бара. Бинаны төзекләндерүнең гомуми смета бәясе 25,2 миллион долларны тәшкил иткән. Төзүчеләр дә, Президент та театрның 1000 еллыкка өлгерүенә шикләнми.

М.Шәймиев юбилей юңаеннан шулай ук башка объектларның төзекләндерелүе дәвам итүен билгеләп үтте. Яшь тамашачылар театры ремонтлануын, Г.Камал театрында яңарту эшләре баруын һәм Качалов театрында инде ничә ел барган төзекләндерү эшләрен искә алды. Президент 1000 еллыкка Казанда яңа Боз сараен салу өчен "Зенит" банкы белән финанслау мәсьәләсе чишелүен һәм халыкара класстагы ипподром төзүгә дә акчалар табылуын, башкалада төзеләчәк башка объектлар турында да әйтеп үтте. Шулай ук Минтимер Шәймиев федераль үзәк юбилейга үз ягыннан финанслауны тоткарламавын белдерде.