Минтимер Шәймиев: "Җирдә эшләүче кешеләрнең үз җирләренә хуҗа булуын телим"

"Бүген җирдә эшләүче кешеләрнең үз җирләренә хуҗа, мөлкәт иясе булып әверелүләрен бик телим. Без аларга бу юлда ярдәм итәргә тиеш. Сезнең бу җиргә әхлакый хокукыгыз бар", - дип белдерде ТР Президенты Минтимер Шәймиев Питрәч, Балык Бистәсе районнарына сәфәре вакытында.

Ул Казанарты районнарында уңыш җыю башлануының барышын тикшерде. Ә быелгы эшләр кырда ун көнгә алдан башланды. Президент быел республикада 10 процент уңыш җыеп алынганлыгын искәртте. Беренче сугулар ашлыкның уңышын бер гектардан 30 центрдан да ким булмавын күрсәтә. Икмәкнең дымлылыгы 16-17 процент тирәсе. Шушы көннәрдә Татарстан буенча бер көнгә 110 мең тонна тирәсе ашлык суктырылган. Берничә көннән ул 200 меңгә дә җитәргә мөмкин. Көннәр кояшлы торганда суктырып калырга кирәк.

 "Кырларда чын көрәш башлана. Мин быелгы авыл хуҗалыгы елын уңышлы дип атар идем. Һава торышы яхшы торганда без яхшы уңыш җыя алабыз", - ди Президент. Өметләр орлыклы культураларга гына түгел, яшелчәләргә, бәрәңгегә, үләннәргә дә кагыла. Иң мөһиме, аларны вакытында җыйнап сакларга салу.

 Питрәч районында авыл хуҗалыгы җирләре 108,7 мең гектар урын били. Ул җирләрдә 21 оешма, шул исәптән 13 авыл хуҗалыгы берләшмәсе хезмәт итә. Бүген районда биш инвестор да эшли. Әйтик "Татарстан сөте", "Ак Барс" банкы, "Казан ит комбинаты", "Таттрансгаз" һәм "Полимекс". Инвесторлар ярты елда гына да 82 миллион 642 мең сум акчаны авыл хуҗалыгына салганнар. Шуның ярдәмендә техника яңартыла, яңа технологияләр кертелә.

 Әнә "Газовик" хуҗалыгында 800 мең тонна ашлык җыелган инде. 30 процент җирләр җыйналган, 27 процент ашлык сугылган. Президент аларның үрнәгенә ияреп, тиз арада, кояш чыгып торганда, ашлыкны җыеп бетерүне оештыруны сорады. Шулай ук күчмә техника колонналарында да чын хуҗа җитмәгәнлеге ачыкланды. Аларда әле дә күп машина төзек түгел.

 Президент Питрәч районында "Татарстан сөте" холдингы оештырган хуҗалыкта соя үстерү технолгиясе белән танышты. Соя исә киләчәк ашлыгы, ул аксымга бик бай. Ә "Марс" хуҗалыгында исә элиталы бәрәңге үстерәләр. Бүлбеле үсемлек корткычлардан сакланып үсә. Бүгенге көндә казып каралган бер төптә ике килограмм бәрәңге булуы ачыкланды. Ә көзге суыкларга кадәр әле аның үсәсе дә бар. Димәк яхшы уңыш көтелә.

 Балык Бистәсе районында да авыл хуҗалыгы турында сүз дәвам итте. Аларда 104,8 мең гектар хуҗалык максатларына кулланыла, 14 кооператив эшли. Президент "Әнәтеш" хуҗалыгы кырында булды. Анда техникаларның искелеге күзгә күренде. Әмма уңыш булса, техниканы сатып лизингка алырга мөмкин булуын искәрттеләр. Шулай ук Балык Бистәсендә икмәк кабул итү оешмасында да очрашулар узды. Быел алар да уңышлы эшләргә өметләнә.

 Бүгенге көндә авылга инвесторлар килүен дәвам итә. "Минем санавымча, бу процесста без РФ буенча иң алда барабыз. Соңгы елларда миллионга якын җирләрне инвесторлар эшкәртә башлады. Аларның тәҗрибәсе исә авыл хуҗалыгына инвестицияләрне салуның реаль эш булуын күрсәтте. Ә инвестицияләр булган җирдә исә эшләр башкача бара. Мөмкин булса, тагын да алга барырга кирәк: акча кертеп уңыш алуны арттырып", - диде Минтимер Шәймиев.