"Бертуган Знаменскийлар мемориалы" һәр елны үткәреләчәк

Бүген Казан Кремлендә Татарстан Президенты Минтимер Шәймиев Бөтенроссия җиңел атлектика федерациясе Президенты Валентин Балахничевны һәм Россиянең җиңел атлетика буенча җыелма командалары тренеры Валерий Куличенконы кабул итте. Очрашуда шулай ук ТР Премьер-министр урынбасары Зилә Вәлиева, Яшьләр эшләре һәм спорт министры Марат Барыев һәм Казан мэры Камил Исхаков катнашты.

Президент белән очрашуда киләсе, Казанның юбилей елында да башкалада "Бертуган Знаменскийлар мемориалы" ярышларын үткәрү турында сүз барды. Россиянең олимпиа җыенына кандидат булырдай Татарстан спортчылары, җиңел атлетиканы үстерү өчен республика программасын булдыру турында да сөйләшенде.

"Без "Бертуган Знаменскийлар мемориалы"ның һәрвакыт Татарстан башкаласында үткәрелүен телибез. Бу ярышлар - Россиянең иң күренекле җиңел атлетика турниры булып тора һәм ул Казанның визит карточкасына әйләнәчәк, - дип фикерләре белән уртаклашты Валентин Балахничев. - Әлбәттә, бу мемориал табышлы булырга тиеш. Әлегә алар Гран-при II ярышлары кебек үтә, дөнья лигасына кергән очракта аны Халыкара җиңел атлетика федерациясе финанслаячак", - диде В.Балахничев.

Валерий Куличенко исә бүгенге көндә Россиянең олимпия җыелма командасына Татарстаннан алты спортчы керергә ниятләвен хәбәр итте. "Команданың төгәл составы 28 июльдән 1 августка кадәр Тулада үтәчәк Россия чемпионатында билгеләнәчәк. Афинага, мөгаен, дөнья рекордчысы, ике тапкыр Россия чемпионы булган Гөлнара Сәмитова барыр", - дип өстәде баш тренер.

Бүген "Бертуган Знаменскийлар мемориалы"нда Бөтенроссия ярышлары уза. Анда спортчылар җиңел атлетиканың 100 (ирләр һәм хатын-кызлар), 200 (ир./х-к.), 400 (ир.), 800 (ир.) метрга йөгерү, 110 (ир.), 400 (ир./х-к.) метрга, 3000 (ир./х-к.) метрга киртәләр аша йөгерү, колга белән сикерү (х-к.), диск ыргыту (ир./х-к.), озынлыкка сикерү (ир./х-к.), биеклеккә сикерү (ир.), ядрә ыргыту (х-к.) кебек төрләрендә көч сынаша.

Иртәгә мемориал ИААФ "Гран-при" сериясендәге ярышлар кысаларында үтәр дип көтелә. Халыкара җиңел атлетика федерациясе призын алу өчен 23 ил спортчысы көрәшәчәк.