Казанга Казахстан Президенты Нурсолтан Назарбаев килә

29-нчы июньдә 18:35 минутта Казанга Казахстан Республикасы Президенты Нурсолтан Назарбаев килде.

Дәрәҗәле кунакны ТР Президенты Минтимер Шәймиев, ТР Премьер-министры Рөстәм Миңнеханов, ТР Дәүләт Советы рәисе Фәрит Мөхәммәтшин каршы алды.

Казахстан Республикасы Индустрия һәм сәүдә министры Гаделбәк Яхшыбаев җитәкләгән сәнәгатьчеләр һәм эшмәкәрләр делегациясе инде кичә иртән Казанга килеп җиткән. Алар "Серьго исемендәге завод" җитештерү берләшмәсе, "Казан вертолет заводы" ААҖ эшчәнлеге белән танышты. Шулай ук, Казахстан делегациясенең ТР Премьер-министры Рөстәм Миңнеханов белән дә очрашуы фаразлана.

Татарстан Республикасы Президенты Минтимер Шәймиев һәм Казахстан Республикасы Президенты Нурсолтан Назарбаев арасында узачак сөйләшүләр ике як арасында хезмәттәшлекне ныгыту мәсьәләләренә багышланачак.

Эшлекле сөйләшүләрдән тыш, Казанда Россия һәм Казахстан галимнәре катнашлыгында "Лев Гумилевның фәнни мирасында Евразия идеясе" темасына халыкара фәни-гамәли конференция оештырылачак.

Ике як арасында төзелгән хезмәттәшлек килешүләрен тормышка ашыру нәтиҗәсендә 2003 елда Татарстан һәм Казахстан республикалары арасында тышкы сәүдә әйләнеше күләме 126 миллион доллардан арткан. Сәүдә әйләнешенең 109 миллион доллар өлешен Татарстан экспорты тәшкил иткән.

ТР Сәүдә һәм тышкы икътисадый хезмәттәшлек министрлыгы белгечләре фикеренчә, Татарстан өчен Казахстан белән йөк машиналары, вертолетлар, суыткычлар җитештерү, сәүдә итү һәм ремонт ясау өлкәсендә хезмәттәшлекне җәелдерү мөмкин.