Алексеевск районының яңа башлыгы сайланды

Бүген Татарстан Республикасының Алексеевск районында халык депутатларының чираттан тыш сессиясе узды. Аның эшендә ТР Президенты Минтимер Шәймиев, ТР Президент Аппараты вәкилләре, районның 22 депутаты, ширкәтләр җитәкчеләре катнашты. Сессиядә барлыгы дүрт мәсьәлә каралды. Шуның иң беренчесе Татарстан республикасы Алексеевск районы хакимияте башлыгын сайлау.

Билгеле булганча, узган атнада Алексеевск районы башлыгы Алексей Демидов Татарстан Республикасының Хисап палатасы рәисе итеп сайланган иде. Шул нисбәттән, бүген яңа хакимият башлыгы билгеләнде. Минтимер Шәймиев: "Алексей Демидовны озатуы сезгә күңелсездер. Чөнки ул намуслы, хезмәт сөючән җитәкче, дип башлады үз чыгышын. - Хисап палатасына аны мин тәкъдим иттем, Татарстан Дәүләт Советы аны хуплап алды. Бу яңа Конституцион орган. Аның вәкаләтләре зуррак. Һәм ул халыкка хезмәт итәргә тиеш. Бүгенге базар шартларында яңа органнар төзелә, яңа законнар тиз арада барлыкка килә. Әмма ул законнарсыз булмый, чөнки дөньядан артта калачакбыз", - диде.

Алексеевск районы соңгы елларда шактый үсеш алган. Биредә шактый гына төзелеш эшләре алып барыла. Районга килеп кергәч үк яңа сафка баскан биналарга тап буласын. "Алекссевск районында эшләү беркайчан да җиңел булмады. Башта монда эшче куллар җитмәве нык үзен сиздерде. Әмма Алексей Демидов барысын да җайга салды. Хәтта зур храм да төзеп куйдылар. Ә бу барысының да хәленнән килми. Яңа җитәкче дә әлеге эшләрне дәвам итәр", - диде Минтимер Шәймиев. Яңа хакимият башлыгы кандидатурасын Минтимер Шәймиевкә Алексей Демидов тәкъдим иткән. Тумышы белән Алексеевскидан булган Владимир Козонков бик уңган җитәкче булуын билгеләде, Татарстан Президенты. "Иң моһиме Алексеевскида халыклар арасында булган дустанә мөнәсәбәтләр саклансын иде", - диде Минтимер Шәймиев. Әйтергә кирәк, Алексеевскида 57,7 процент урыслар, 30,7 процент татарлар, 6,6 процент чувашлар, 3,6 процент мордва халкы яши. Районда храм да, мәчет тә бар.

Элеккеге район хакимияте башлыгы, хәзер Хисаплау палатасы рәисе Алексей Демидов үз чыгышында: "Безгә җиңел булмады, икътисадның җимерелгән 80-90нчы елларны бергәләп узарга туры килде. Әмма хәзер без үз районыбыз белән горурлана алабыз. Чөнки газлаштыру программасын үтәп бетердек, юлларга асфальтлар салынды, торак-комуналь хуҗалыгын рәткә китердек. Барысына да минем белән кулга-кул тотынып эшләгән өчен зур рәхмәт", - диде. Шулай ук ул авыл хуҗалыгындагы уңышлар турында да әйтеп узды. "Кызыл Шәрекъ", "Татарстан сөте" һәм тагын берничә инвесторлар белән эшләвен билгеләде.

Сессиядә шулай ук төрле хуҗалык рәисләре дә чыгып Алексей Демидовка рәхмәт белдерделәр. Шуннан соң район халык советы депутатларының рәисе сайланды. Әлеге вазыйфага Валерий Иванов билгеләнде. Урыс исем-фамилияле булса да, милләте буенча татар кешесе икән.