Өметле һәм җаваплы көн

Татарстан Республикасы Президенты Минтимер Шәймиевнең республика гражданнарына мөрәҗәгате

12 март, 2004 ел

Хөрмәтле ватандашлар!

Россия Федерациясе Президентын һәм Татарстан Республикасы Дәүләт Советына депутатлар сайлау кампаниясе төгәлләнеп килә. Илебезнең һәм республикабызның үсеш юллары турында сайлау алды бәхәсләре, сүз көрәштерүләр вакыты узды. Һәрберебезнең язмышына кагылышлы җаваплы көн килеп җитте.

Россия дәүләтенең башлыгын сайлау — илебездәге иң мөһим, хәлиткеч кампания. 14 нче март көнне кем өчен тавыш бирүебезне билгеләгәндә, һәркайсыбыз ачык аңларга тиеш: хәзерге Россиягә нинди Президент кирәк соң?

Минем уемча, халыкның күпчелеге Россия Президенты постында реформаларны халык мәнфәгатендә үткәрүче, иминлек гаранты булырлык, җәмгыятьне үз тирәсенә туплый алырдай, илебезне дөнья буенча алга чыгарырга сәләтле дәүләт эшлеклесен күрергә тели.

Илнең киләсе дүрт елга үсеш юнәлешләре инде нигездә билгеле. Аның төп юнәлешләре: икътисадый үсешне бар яктан да тизләтү; фәкыйрьлекне бетерү, фән-техника яңарышы, мәгарифкә, сәламәтлекне саклауга дәүләт ярдәме, дәүләт төзелешендәге реформаларны дәвам итү; Россиянең оборона куәтен торгызу һәм халыкара позициясен ныгыту.

Россия җитәкчелеге белән үзара хезмәттәшлек һәм аңлашу Татарстан өчен аеруча зур әһәмияткә ия. Республиканың социаль-икътисадый үсеше һәм Казанның меңъеллыгын бәйрәм итү программаларын гамәлгә ашыру, үзара вәкаләтләр бүлешү, милли-мәдәни мәсьләләләрне уңай хәл итү безнең өчен бик мөһим.

14 нче март көнне без сезнең белән Россия Президентына кандидатлар арасыннан заман таләпләренә туры килүче, алдагы максатларны тормышка ашырырга сәләтле, Татарстан белән теләктәш дәүләт эшлеклесен сайлап алырга тиешбез.

Хөрмәтле ватандашлар!

Безнең өчен Татарстан Республикасының Дәүләт Советына сайлаулар да бик җитди мәгънәгә ия. Быелгы кампания аерата үзенчәлекле, чөнки республикада беренче тапкыр, сайлаулар, бер мандатлы округлар белән беррәттән, партия исемлекләре буенча да узачак. Шул ук вакытта, барыгызга да мәгълүм булганча, киләчәктә җирле үзидарә органнарын һәм аларның җитәкчеләрен сайлаулар да шушы система буенча үткәреләчәк. Бу безнең өчен тәҗрибә туплау да булып тора.

Безнең киләчәгебез, республика һәм аның халкы өчен файдалы, нигезле программалар тәкъдим итеп, кулыннан эш килердәй кандидатларны һәм ышанычлы партияләрне яклап тавыш бирерсез дип ышанам. Без мондый сынауны, декабрь аенда Дәүләт Думасына булган сайлауларда акыл белән эш итеп, лаеклы рәвештә уздырдык.

Хөрмәтле сайлаучылар!

Сайлаулар көне алдыннан, гадәттәгечә, сайлау алды өндәүләре туктатыла. Бу вакыт безнең барыбызга да ныклап уйланыр өчен, үзара киңәш-фикер алышу өчен бирелә. Татарстан сайлаучылары моңарчы үзләрен һәрвакыт актив һәм җавапчыл гражданнар буларак күрсәтеп килделәр. Бу юлы да мин сезнең зирәклеккә чын күңелдән ышанам. Минем мөрәҗәгатемнең төп максаты шул: сезне сайлауларда актив катнашырга, җаваплы һәм аңлы рәвештә тавыш бирергә чакырам.

Барыгызга да исәнлек-саулык, иминлек телим.

Игътибарыгыз өчен зур рәхмәт.