Минтимер Шәймиев Чистай районында

Бүген Татарстан Президенты Минтимер Шәймиев эшлекле сәфәр белән республиканың Чистай районына китте.

Көнне Илбашы "Чистай-220" станция ярдәмчесен ачу тантанасында катнашты. Әлеге станция ярдәмчесе Кама аръягы төбәгендә нефть табу объектларын электр белән тәэмин итүгә билгеләнгән. Шул ук вакытта ул республиканың җиде районын - Алексеевский, Әлки, Аксубай, Яңа Чишмә, Нурлат, Спасс һәм Чистайны электр белән тәэмин итүдә төп станцияләрнең берсе булачак. "Чистай-220" бөтен Кама аръягын электр белән тәэмин итәргә мөмкинлек бирәчәк. Объект 1994 елда төзелә башлаган. Финанслар җитмәү сәбәпле төзелеш озакка сузылса да, "Татэнерго" җитәкчелеге кирәкле акчаларны таба алган. Энергетикларга нефтьчеләрнең ярдәме зур булган. Төзелеш 400 миллион сумга төшкән. Әлеге станция, Кама аша салынган күпер кебек үк Кама буе төбәгенең үсешендә зур адым булып санала.

Чистай электр станциясе директоры Александр Наумов белдергәнчә, быел Чистай электр челтәрләре көче белән Аксубайның «Ибрайкино», «Тимошкино» һәс Спасс районындагы "Болгар" станция ярдәмчәләрендә төзекләндерү эшләре үткәрелгән.

"Чистай-220" подстанциясен ачканда Татарстан Президенты әлеге вакыйганы Татарстан өчен күренекле вакыйга дип атады. "Республика җитештерү күләмен арттырмаса, мондый станцияләргә ихтыяҗ булмас иде", - диде Минтимер Шәймиев.

Президент төзелешнең озак баруын, әмма бүгенге республика тагын да зур электр көчәнешенә мохтаҗ булуын искә алды. "Көчле станция ярдәмчесенең төзелүе тормыш таләбе", - дип ассызыклады Президент. Быел республикада җитештерү күләме 300 миллиард сумга җитәргә мөмкин. Дүрт айның нәтиҗәләре буенча үсеш 5,5 проценты тәшкил иткән.

Президент белдергәнчә, "Татэнерго" системасының үзендә дә үзгәрешләр үткәрелгән. "Берничә ел элек энергетикларның хәле мактанырлык түгел иде. Бәхеткә ул вакытлар куркыныч төш төсле үтеп китте", - диде Президент.

Минтимер Шәймиев "Татэнерго" җитәкчелеген башкарган эшләре өчен рәхмәт әйтте. Энергетика тармагы, "Татнефть" һәм "КамАЗ" кебек үк, җитештерү күләме һәм салым түләве буенча республикада беренче бишлеккә керә диде ул.

Бүгенге көндә республикада 2010 елга кадәр энергетиканы үстерү программасы эшли. Аның нигезендә электр энергиясен 22 процентка үстерү планлаштырыла. "Шулай да көндәшлекне саклау өчен энергетикларга тарифларның үсешен тоткарларга кирәк булачак. Алайса предприятиеләр электр энергиясен башка җитештерүчләрдән сатып ала башлыячак", - дип белдерде Президент. "Бүген без энергетикларга торак-коммуналь хуҗалык реформасында актив кушылу бурычын куябыз", - диде Минтимер Шәймиев. Станция ярдәмчесен ачу тантанасында Президент мактаулы энергетикларга дәүләт бүләкләрен тапшырды.