Президент Россия һәм Татарстан Дәүләт бүләкләрен тапшырды

Бүген Казан кремлендәге Сараенда Татарстан Президенты Минтимер Шәймиев республиканың күренекле фән, мәдәният, сәнгать, сәнәгать һәм икътисад эшлеклеләренә Россия Федерациясенең һәм Татарстан Республикасының Дәүләт бүләкләрен тапшырды.

Бүләкләү тантанасына килүчеләргә республиканың социаль-иктисади үсешенә зур өлеш кертүләре өчен Президент зур рәхмәтен белдерде. Шулай ук аларны республиканың бүгенге көндәге төп сәяси-икътисади үсеш юнәлешләре белән таныштырды.

Иң элек М.Шәймиев Россия Федерациясенең булачак Президент сайлауларына һәм Россия хөкүмәтендәге үзгәрешләргә карата фикерләрен җиткерде. "Безгә ул үзгәрешләрнең йогынтысы ни дәрәҗәдә булыр, әлегә әйтүе кыен. Шулай да яңача идарә итү формасы көтеп алынган эш, бу замана таләбе, - диде Президент. - Безнең хакимият структураларында сизелерлек үзгәрешләр булыр дип уйламыйм. Акрын гына ашыгырга кирәк. Бигрәк тә Татарстан Дәүләт Советына сайлаулар алдында торганда. Без быел беренче тапкыр сайлауларны яңа формада үткәрәчәкбез", - дип искә алды М.Шәймиев.

Республиканың үткән елгы нәтиҗәләр буенча социаль-икътисади үсеш күрсәткечләре көткән өметләрне аклады, диде Президент. 2004 елның гыйнвар-февраль аенда да үсеш темплары сизелә. Сәнәгать өлкәсенә килгәндә Минтимер Шәймиев тагын бер кат нефтехимия өлкәсенә өстенлек биреләчәген һәм узган ел нәтиҗәләре буенча бу өлкәдә табышлылыгы 13 процентка күтәрелүен ассызыклап үтте.

Социаль проектларның тормышка ашырылуын искә алып, Президент республикада тузган торакны бетерү программасының төгәлләнүе һәм булачак социаль ипотека турында сөйләде. Яшь гаиләләр һәм бюджетта эшләүчеләр өчен Татарстанның ипотека кредиты процентлары Россиянекенә караганда ике-өч мәртәбә түбәнрәк булачак дип вәгъдә итте.

Минтимер Шәймиев билгеләп үткәнчә, Казанның 1000 еллыгын үткәреп җибәргәч, республика хастаханәләрендәге хирургия бүлекләрен заманча җиһазландыру - төп бурычларның берсе булачак. Бүгенге көндә үк бу эшкә 200 миллон сум күләмендә акча бүленеп бирелгән инде. "Еш кына кеше гомеренең озынлыгы медицианадан, заманча яңа техникадан тора. Алга киткән илләрдә кешенең йөрәк-кан тамыр системасына авыр операцияләр ясау күптәннән гадәти, көндәлек эш кебек. Без мөмкин кадәр хирургия өлкәсен җиһазландыруга көч куячакбыз", - диде Президент. Мәгариф өлкәсенә килгәндә М.Шәймиев кичекмәтән урта профессиональ белем бирү уку йортларының эшенә ныклап алынырга кирәклегенә басым ясады.

Республиканың сәяси-икътисади вәзгыятенә, үсеш юнәлешләренә карата фикерләре белән уртаклашканнан соң Президент чакырылган җәмәгатьчелеккә Россия Федерациясенең Дәүләт бүләкләрен - Мактау, Батырлык, Дуслык орденнарын тапшырды, Россиянең атказанган төзүчесе, машина төзүчесе, фән эшлеклесе, укытучысы мактаулы исемнәрен бирде. Алар арасында узган ел "Россиянең иң яхшы хастаханәсе" исеменә лаек булган Республика балалар хастаханәсенең баш табибы Евгений Карпухин Мактау орденын, рәссам Владимир Попов Россиянең атказанган рәссамы исемен алды.

Бер төркем бүләкләнүчеләр Татарстан Республикасының Дәүләт бүләкләрен - Мактау Грамоталарын, Татарстанның атказанган фән эшлеклесе, табиб, укытучы, икътисадчы, сәүдә, транспорт эшлеклесе, терлекче, геологы мактаулы исемнәренә лаек булды. Алар арасында "Татарстан" Дәүләт телерадиокомпаниясенең дирекция директоры Рәзин Нуруллинга ТР Мактау Грамотасы, нәкышчы Рәшит Имашевка Татарстанның халык рәссамы исеме, "Әкият" Татар дәүләт курчак театры артисты Владимир Фечинга Татарстанның атказанган артисты исеме бирелде. Президент сер итеп кенә "Әкият"нең яңа бинага күчереләчәген хәбәр итте. Ә театрның бүгенге бинасын, элеккеге чиркәү буларак, дин әһелләренә кайтарылачагын әйтте.