Олимпиадаларга бергә әзерләнәчәкбез

Татарстан Республикасы белән Россиянең Олимпия комитеты арасындагы хезмәттәшлек турындагы килешүгә инде быелның август аенда ук кул куелырга мөмкин. Әлеге документның төп максаты (бүгенге көндә аның пунктлары җентекләп тикшерелә) - спортчыларны алдагы Олимпия уеннарына бергәләп әзерләү.

Бу хакта 28 июльдә Казан Кремлендә үткән Татарстан Президенты Минтимер Шәймиевнең Россия Олимпия комитеты президенты Леонид Тягачев белән очрашуы вакытында мәгълүм булды.

Бүген Татарстанда спортның 49 олимпия төренең З6сы үсештә. 2002 елда гына республикабыз спортчылары чемпионатларда, Россия, Европа һәм Дөнья кубокларында 408 медаль яулады, аларның 149ы - алтын, 130ы - көмеш һәм 129ы - бронза. Олимпия уеннары һәм аларда җиңү иң югары күрсәткеч, маяк булып тора, бу хакта үз гомерен спортка багышлаган һәркем хыяллана, дип искәртте Татарстан Президенты.

Хәер, Олимпия уеннарында җиңүгә ирешү өчен (киләсе Олимпия уеннарына күп калмады да инде - 2004 елда Афинада җәйге, ә 2005 елда Туринда кышкы Олимпия уеннары уздырылачак) инде бүген ук киләчәк турында уйларга кирәк. Олимпия резервын үстерү өчен база, яшьтән үк җитди рәвештә әзерләү өчен спортчыларга даими шартлар булдырырга кирәк, дип исәпли Минтимер Шәймиев.

Һәм Татарстанның моннан берничә ел элегрәк физкультура һәм спортны массакуләм үстерүгә алган юнәлеше моңа туры килә дә. Бүгенге көндә балалар-яшьләр спорт мәктәпләрендә шөгыльләнүчеләр саны 1999 елдагы белән чагыштырганда яртыдан күбрәккә артты. Спорт белән массакүләм төстә мавыгу нәтиҗәләре инде күренә дә - соңгы елларда республика командалары хоккейда, футбол, баскетбол, волейболда премьер-лигаларга чыкты. Татарстанда спортны үстерү өчен яңа спорт корылмалары төзелә, һәм бу әле зур эшнең башы гына.

Күбрәк төзегән саен, нагрузка да күбрәк төшә, спорт комплекслары күбрәк таләп ителә, әмма бу безнең өчен күңелле хәл генә, диде республика җитәкчесе һәм, үзенең әйткәннәрен раслап, инде киләсе сезонга ук Югары Ослан районында заманча тау чаңгысы комплексын булдыруның күздә тотылуы турында хәбәр итте.

Президент фикеренчә, республикада әлеге спорт төренең киләчәге зур - бүгенге кендә яшьләр спортның нәкъ менә үзләренең теләк-омтылышларын чагылдырырдай экстремаль төрләренә өстенлек бирә. Моннан тыш безнең төбәктә кыш ярты ел диярлек дәвам итә, бу да спортның кышкы төрләрен үстерүгә нигез булып тора.

Минем өчен иң мөһиме - Россия командасының 2004 елда Афинада үтәчәк Олимпия уеннарына әзерләнүе һәм анда катнашуы, дип искәртте Россия Олимпия комитеты президенты. Ә команданы әзерләүне дөрес оештыру өчен перспективаларны белү кирәк, спортчыларны әзерли, программалар эшли алырдай спорт үзәкләрен, базаларны билгеләү мөһим.

Леонид Тягачев фикеренчә, Татарстан спортның су төрләре (җилкәнле спорт, ишкәк ишү Һ.6.), уен төрләре (волейбол, баскетбол, футбол Һ.6.), ат спорты һәм, әлбәттә инде, спортның кышкы төрләре (ике төр буенча чаңгы узышларын, тау чаңгысын да кертеп) буенча спортчылар әзерләү базасына әверелә алыр иде.

Суз уңаеннан, шуны да әйтик, Россия Олимпия комитеты президенты хәбәр иткәнчә, очрашу вакытында сноуборд, тау чаңгысы, фристайл өчен заманча ябык тау чаңгысы комплексы төзү мөмкинлеге тикшерелде. Аның фикеренчә, бу спортны үстерүгә, республикада яшәүчеләрне сәламәт тормыш рәвешенә җәлеп итүгә ярдәм итү белән беррәттән, табыш алуга һәм тулаем алганда спортны финанслауга өстәмә мөмкинлекләр дә ача алыр иде.

Очрашуда шулай ук спорт медицинасы, тренерлар әзерләү мәсьәләләре, спорт чараларын өстәмә финанслау мөмкинлекләре, спорт корылмалары төзү һәм спорт кирәк-ярагы сатып алу һ.б. мәсьәләләр буенча да фикер алышу булды.

Минем фикеремчә, Казанга бу сәфәребез Олимпия уеннарына әзерләнү буенча гына түгел, киләчәктә Россиягә уңыш китерердәй балалар спорты, зур спорт үзәкләре булдыру буенча да зур эшнең башы булып тора. һәм моңа ирешү өчен барлык проблемаларны хәл итү юлларын бергәләп эзләргә кирәк.

Татарстан белән Россия Олимпия комитетының уртак гамәлләре Килешүдә дә билгеләнәчәк. Әлеге килешүгә, Леонид Тягачев әйткәнчә, инде ике атнадан соң ук кул куелачак.

Очрашуда ТР Премьер-министры урынбасары Зилә Вәлиева, ТР яшьләр эшләре һәм спорт министры Марат Бариев, Казан мэры Камил Исхаков һәм башкалар катнашты.

Шул ук көнне Россия Олимпия комитеты президенты Баскет-холлда, Спорт сараендагы Татарстанның спорт даны музеенда, "World class - Kazan" фитнес үзәгендә булды, Югары Ослан районында тау чаңгысы комплексында эшләр барышы белән танышты.