Президент М. Шәймиев Украина Президенты Л. Кучма белән очрашты

21 июльдә Татарстан Республикасы Президенты Минтимер Шәймиев Кырымда Украина Президенты Леонид Кучма белән очрашты.

Очрашуда узган елның шушы чорында Татарстан һәм Украина президентларының "Укртатнафта" компаниясе эшчәнлегенең нәтиҗәлелеген арттыру турында сөйләшүләр алып барганлыгы искәртелде. Кадрлар составын ныгыту буенча хәлиткеч адымнар ясалды. Компаниянең төп предприятиесе булып торучы Кременчуг нефть эшкәртү заводының җитәкчелеге алышынды.

Нәтиҗәдә бер ел эчендә уңай якка үзгәрешләр булды: компаниянең 2002 елдагы һәм 2003 елның беренче яртыеллыгындагы үсеш йомгаклары өметле дип танылды. Очрашуда катнашучылар шулай ук Кременчуг нефть эшкәртү заводын хосусыйлаштыруның барышын да тикшерде.

Татарстан Президенты "республикалар арасында үзара аңлашу бар, һәм шушы нигездә уртак планнарны тормышка ашырырга килеп туган проблемаларны хәл итәргә кирәк", дип ассызыклады.

Очрашуда Украина һәм Татарстан Республикасы арасында алга таба хезмәттәшлеккә кагылышлы, аерым алганда, Украина территориясендә "КамАЗ"лар җыю прозводствосын көчәйтү, Кара Диңгез флотының тормыш эшчәнлеген тәэмин итүдәге проблемаларны хәл кылу ысуллары һ.б. мәсьәләләр буенча да фикер алышу булды.

Очрашуда Татарстан Республикасы Премьер-министрының беренче урынбасары Равил Моратов, "Татнефть"ААҖ генераль директоры Шәфәгат Тәхаутдинов, Татарстан Республикасының Украинадагы Сәүдә вәкиллеге җитәкчесе Ростислав Вахитов катнашты.