Коитиро Мацуура Казанда

2 июньдә Татарстанга ЮНЕСКО Генераль директоры Коитиро Мацуура килде. Татарстан Президенты Минтимер Шәймиев бу визитны тарихи вакыйга дип атады.

"Казан" халыкара аэропортында аны каршы алганда республика башлыгы шуны ассызыклады: безнең үзара аңлашу бар, ә иң әһәмиятлесе -ЮНЕСКО һәм Татарстан арасында сөйләшү өчен нигез бар. Халыкара оешма башкара торган миссия үзе үк шушы үзара аңлашуның нигезе булып тора.

- Мин ЮНЕСКО һәм Татарстан Республикасы арасындагы мөнәсәбәтләрне ничек ныгыту һәм алга таба хезмәттәшлегебезне үстерү турында конкрет сөйләшергә теләр идем, - диде Мацуура әфәнде. - ЮНЕСКОда Татарстан Республикасы көннәрен уздырганда Парижда мине бирегә килергә чакырганы өчен Президент Минтимер Шәймиевкә рәхмәтлемен, Татарстан Республикасы көннәре кысаларында оешманың штаб-квартирасында республика сәнгать осталары концерты һәм Казанга нигез салынуның 1000 еллыгына багышланган күргәзмә эшләде.

Коитиро Мацуураны Казан халыкара аэропортында шулай ук ТР Премьер-министры урынбасары Зилә Вәлиева, Казан хакимияте башлыгы Камил Исхаков. ТР мәдәният министры Илдус Тарханов һәм башкалар каршы алды. Мацуура әфәнде белән бергә Казанга РФ тышкы эшләр министры беренче урынбасары Элеонора Митрофанова килде.

Шул ук кичне Минтимер Шаймиев Мацуура әфәнде өчен Казан Кремлендә кыска экскурсия үткәрде. Казан Кремленең Мәскәү Кремле белән, Санкт-Петербургның тарихи үзәге белән, Алтайның алтын таулары, Россия Федерациясенең аз санлы башка объектлары белән беррәттән ЮНЕСКОның Табигать һәм мәдәният мирасы исемлегенә кертелгәнлеген искә төшереп узарга кирәк.

Аннары Казан Кремлендә Татарстан Президенты Минтимер Шаймиев белән ЮНЕСКО Генераль директоры Коитиро Мацуура арасында әңгәмә булды. Яклар безнең республиканың ЮНЕСКО программаларында һәм проектларында катнашуы, шулай ук Казанга нигез салынуның 1000 еллыгын, Казан университетының 200 еллыгын бәйрәм итүгә әзерлек мәсьәләләре буенча фикер алышты. Минтимер Шәймиев "Казан Кремле" тарих-архитектура комплексының Бөтендөнья мирасы исемлегенә кертелүен рәхмәт хисе белән билгеләп узды, бу хәл аның кыйммәтен халыкара тану факты гына түгел, Татарстанның күпмилләтле халкын ихтирам итү билгесе дә булып тора. Республика башлыгы "Сабантуй" татар милли бәйрәмен ЮНЕСКО халык авыз иҗаты һәм матди булмаган мирас җәүһәрләре исемлегенә кертү, "Болгар" тарих-архитектура комплексын ЮНЕСКО Бөтендөнья мирасы исемлегенә кертү турында теләк белдерде.

Җылы кабул иткәне өчен М.Шәймиевкә рәхмәт әйтеп, Мацуура әфәнде ЮНЕСКО кабул иткән карарның дөреслегенә шәхсән ышануын күрсәтеп узды. Казан Кремлен Бөтендөнья мирасы исемлегенә кертү шәһәрнең абруен күтәреп кенә калмый, анда яшәүчеләрнең барысына да шушы хәзинәне саклау өчен аерым җаваплылык та йөкли, диде ул. Очрашу йомгаклары буенча Татарстан Президентының Кремль резиденциясе тантаналар залында Коммюникега кул куелды. Документка ЮНЕСКО Генераль директоры Коитиро Мацуура һәм Татарстан Президенты Минтимер Шәймиев кул куйды. Шуннан соң Россия һәм Татарстан массакүләм мәгълүмат чаралары журналистлары өчен матбугат конференциясе булды.

Матбугат конференциясе барышында Мацуура әфәнде ЮНЕСКОның мәдәният өлкәсендә Татарстан белән инде берничә ел хезмәттәшлек итүен күрсәтеп узды. Зур, кызыклы элемтәләр барлыкка килде. Моннан ике ел элек ЮНЕСКО үзенә Матди булмаган мирас исемлеген төзү инициативасын кабул итүе турында белдерде. Анда бөтендөнья рухи мәдәният җәүһәрләре сайлап алыначак. Бүген 60 ка якын номинант, шул исәптән, "Сабантуй" татар милли бәйрәме дә шушы Исемлеккә керүгә дәгъва итә. Кандидатларны сайлап алу өчен Халыкара жюри төзеләчәк. Аның составына 18 эксперт керәчәк. Сабантуй сайлап алуның төп билгеләмәсенә туры килә. Ул инде ноябрь аенда ук уздырылачак. Әлеге бәйрәм халык чын күңелдән ярата торган тере традиция булып тора. ЮНЕСКО шулай ук Болгар һәм Свияжскига кагылышлы барлык материалларны игътибар белән тикшерәчәк. Ахыргы карарга килү өчен ЮНЕСКО экспертлары шушы тарихи урыннарда булырга тиеш.

Минтимер Шәймиев Мацуура әфәнденең Парижда моннан ике ел элек ирешелгән хезмәттәшлек турындагы килешүләрнең барлык пунктларына үтә игътибарлы караганлыгын билгеләп узды. Ул югары ышанычка ия булган кешенең нинди булырга тиешлегенә гүзәл үрнәк булып тора.

3 июньдә Мацуура әфәнде Татарстан башкаласы белән танышуны дәвам иттерәчәк.