Татарстан Республикасы һем "Транснефть" АК" акционерлык җәмгыяте арасында үзара хезмәттәшлек турында килешү төзелде

Татарстан Республикасы һем "Транснефть" АК" акционерлык җәмгыяте арасында үзара хезмәттәшлек турында килешү төзелде. Аңа ТР Президенты Минтимер Шаймиев һәм "Транснефть" АК" акционерлык җәмгыятенең президенты Семен Вайншток кул куйды. Шул уңайдан алар матбугат конференциясендә журналистлар белән очрашты.

Минтимер Шәимиев әйтүенчә, әлеге килешүнең Татарстан өчен әһәмияте гаять зур. Беренчедән, безнең нефтьне сатып алучыларга һәм эшкәртү предприятиеләренә вакытында һәм тиешле күләмдә китереп җиткерү белән шушы җәмгыять шөгыльләнә. Икенчедән, аның иң олы тармак предприятиеләренең берсе булган "Төньяк-Көнбатыш магистраль нефтьүткәргече" акционерлык җәмгыятенең хуҗалыгы безнең республика җирендә урнашкан. Эше дә мәртәбәле үзенең - елына 170 миллион тонна нефть кудыра ул.

Әлбәттә, нефть кудыруда табигатьне чиста тоту, аңа зыян китермичә эшләве бик мөһим. Акционерлык җәмгыяте нефть үткәргечләренең торбалары иң зур елгаларыбыз - Нократ, Кама, Идел аша үтә. Торбалар тузган яисә тишелгән очракта табигатькә нинди зур зыян киләчәген күз алдына китерүе дә кыен. Шунысын да өстик: әлеге үткәргечләр халык күп яши торган шәһәр-район-нар янында гына салынган. Алар-га һәрвакыт күз- колак булып тору, һичшиксез, зарур шарт.

Килешүдә менә шул экологияне бозмау өчен кирәкле бар төр чаралар да каралган, дип белдерде Татарстан Президенты. Ул шулай ук килешүнең икътисадка караган ягының да һәрьякка да Файдалы булуын әйтте. Татарстан җирендә эшләгәч, нефть кудыручылар республика бюджетына да шактый саллы өлеш кертә. 1999 елда 114 миллион сум булса, 2002 елда 382 миллион сумга җиткән ул.

"Төньяк-Көнбатыш Себер магистраль үткәргечләре" акционерлык җәмгыяте станцияләр урнашкан һәм нефть үткәргечләре салынган районнарда социаль хәлне җиңеләйтү буенча да зур эш башкара. Йортлар төзи, юллар сала, хастаханәләрне җиһазлауда да ярдәм күрсәтә. Менә быел "Мөслим", "Бисер", "Баланлы чишмә" станцияләре төзелеп бетәчәк. Димәк, татар-станлыларга эш урыннары да арта дигән сүз. Ә хәзер акцио-нерлыкҗәмгыяте барлыгы 5 мең кешене эшле иткән.

"Транснефть" АК" акционерлык җәмгыяте президенты Семен Вайншток Татарстан белән хезмәттәшлектән канәгать калуын әйтте. Татарстан нефтенең артык күкертле булуына дәгъва турында бирелгән сорауга ул: "Бу мәсьәлә хәзер безнең технологиядән генә тора. Анысы да хәл ителгән. Нефтьне күбрәкчы-гарсыннар гына", - дип җавап бирде. С.Вайншток шулай ук компания эшчәнлеге белән дә таныштырды. Узган ел Россиядә "кара алтын" 420 миллион тонна чыгарылса, шуның 400 миллион тоннасы "Транснефть" АК" акционерлык җәмгыяте тарафыннан ташылган. Соңгы өч елда яңа нефть үткәргечләрен төзү эше җәелдерелгән. Чечня Республикасы һәм Украина җирләрен урап узу максатында үткәрелә торганнары озакламый төзелеп бетә. Елына 6 миллион тонна нефть кудырырга мөмкинлек бирәчәк алар. Балтыйк диңгезенә һәм Ерак Көнчыгышта Тын океанга таба юл салу проектлары да якын киләчәк эше, дип белдерде җитәкче.

Күргәнебезчә, Татарстан җире аша "кара алтын" ташучыларның эшләре уңышлы барса, безгә дә файдалы һәм ул килешүдә рәсми төстә теркәлде. Матбугат конференциясендә ТР Премьер-министры Рөстәм Миңнеханов, "Төньяк-Көнбатыш Себер магистраль үткәргечләре" акционерлык җәмгыяте генераль директоры Фәрит Хәйдәров катнашты.