Минтимер Шәймиев Болгарны һәм Свияжскины торгызу проектында катнашучыларның әниләре белән очрашты

Бүген Казан Кремлендә Әниләр көненә багышланган тантаналы кабул итү булды. ТР Дәүләт киңәшчесе, Тарих һәм мәдәни һәйкәлләрне торгызу фондының попечительлек советы рәисе Минтимер Шәймиев “Татарстанның мәдәни мирасы: борынгы Болгар шәһәре һәм Свияжски утрау-шәһәрчеге” проектында катнашучыларның әниләре белән очрашты.

Очрашуда Болгарны һәм Свияжскины торгызу проектында катнашучы инвесторларның һәм оешма җитәкчеләрнең әниләре бар иде. Алар - “КамАЗ” ААҖ генераль директоры Сергей Когогинның әнисе Мария Сергеевна, “ТАИФ” ААҖ генераль директоры Альберт Шиһабетдиновның әнисе Нурҗиһан Фәхретдин кызы, “Ак Барс” ААҖ генераль директоры Иван Егоровның әнисе Аграфина Семеновна, “Бәхетле” ҖЧҖ генераль директоры Мөслимә Латыйпованың әнисе Мөршидә Хәбибулла кызы, “КМПО” ААҖ генераль директоры Дамир Кәримуллинның әнисе Сания Закир кызы, Яшел Үзән муниципаль районы башлыгы Сергей Батинның әнисе Татьяна Михайловна, ТР төзелеш, архитектура һәм торак-коммуналь хуҗалык министры Ирек Фәйзуллинның әнисе Елена Хәбибулла кызы, ТР транспорт һәм юл хуҗалыгы министры Ленар Сафинның әнисе Людмила Сергеевна, “Татинвестгражданпроект” ДУП генераль директоры Гадел Хөснетидновның әнисе Раилә Фәрук кызы, “Казан Кремле” музей-тыюлыгы директоры Зилә Вәлиеваның әнисе Нурдидә Габдрахман кызы, “ТР Баш инвестицион-төзелеш идарәсе” җитәкчесе Рәшит Нуруллинның әнисе Әлфира Йолдыз кызы, Ш.Мәрҗани исемендәге Тарих институтының Илкүләм археологик тикшеренүләр үзәге мөдире Айрат Ситдыйковның әнисе Дамирә Мәгъдән кызы, “Свияжски утрау-шәһәрчеге” музей-тыюлыгы директоры Артем Силкинның әнисе Татьяна Георгиевна һ.б.

Минтимер Шәймиев аларны Әниләр көне белән котлады һәм Болгар белән Свияжскины торгызу проекты, торгызу эшләренең беренче нәтиҗәләре турында сөйләде, аларның балалары катнаша торган изге эш турында үз фикерләре белән уртаклашты. “Бүген улларыгыз һәм кызларыгыз уңышлары өчен куана алуыгызга шатмын. Бу күңелле очрашу, чөнки балаларыгыз белән горурлана аласыз, алар үз эшләре аша барлык кешегә шатлык китерүен тоя аласыз. Бу һәр ананың хыялы”, - дип ассызыклады ТР Дәүләт киңәшчесе.

Минтимер Шәймиев чын күңеленнән шундый уңган балалар тәрбияләгән аналарга рәмәт белдерде.

Аннары һәр кунак Минтимер Шәймиев һәм очрашуда катнашучылар белән таныштырылды. Шул ук вакытта тарихи объектларның төсле фоторәсемнәре, аларның балалары эш нәтиҗәсе буларак, аналарга тәкъдим ителде.

Минтимер Шәймиев әниләргә “Яңарыш” фондының Рәхмәт хатларын тапшырды.

Очрашу ахырында ТР Президентының социаль мәсьәләләр буенча ярдәмчесе, “Яңарыш” фонды башкарма директоры Татьяна Ларионова аналарга бүләкләр тапшырды. Аннары кунаклар өчен Казан Кремле буенча экскурсия оештырылды.