Минтимер Шәймиев ТР Дәүләт Советы утырышында катнашты
Бүген Казанда алтынчы чакырылыш ТР Дәүләт Советының утыз беренче утырышы узды.
Анда Татарстан Республикасы Президенты Рөстәм Миңнеханов, Татарстан Республикасы Дәүләт Киңәшчесе Минтимер Шәймиев, Татарстан Премьер-министры Алексей Песошин, Хөкүмәт әгъзалары, чакырылган кунаклар катнашты.
Утырышны ТР Дәүләт Советы Рәисе Фәрит Мөхәммәтшин алып барды.
Президиум карары нигезендә, утыз беренче утырышның көн тәртибенә 25 мәсьәлә кертелгән, шул исәптән 9 республика законы проекты һәм 11 федераль закон проекты.
Бүгенге утырышның көн тәртибендәге төп мәсьәлә Татарстан Республикасы Президенты Рөстәм Миңнеханов тарафыннан парламентка кертелгән 2021 елда Татарстан Республикасы башкарма хакимияте органнары эшчәнлеге нәтиҗәләре турында хисап булды. Бу мәсьәлә буенча төп нотык белән Татарстан Республикасы Премьер-министры Алексей Песошин чыгыш ясады.
Дәүләт Советы депутатлары Россия Президенты Владимир Путинның Украинаны демилитаризацияләүгә һәм денацификацияләүгә, ДНР һәм ЛНР халкына һәрьяклы ярдәм күрсәтүгә юнәлдерелгән гамәлләрен хуплады. Бүген парламент утырышында илнең илкүләм лидерына тиешле мөрәҗәгать кабул ителде.
Депутатлар Эмиль Хөснетдинов, Артур Әбделҗанов, Юрий Камалтынов, Олег Коробченко, Хафиз Миргалимов, Алсу Нәбиева, Эдуард Шәрәфиев тарафыннан ил Президенты адресына мөрәҗәгать кертелде.
ТР Дәүләт Киңәшчесе Минтимер Шәймиев: "Без хәзер Россия Президенты Владимир Владимирович Путиннан тиешле мөрәҗәгать кабул иттек. Бүген аеруча бердәм булырга кирәк. Шуңа күрә әйдәгез, берләшү турында уйларга һәм илне ныгытырга. Бу – без сайлаган юл, халык шундый үсеш юлын сайлады. Илебезне чәчәк атсын өчен аны яклау юлында берләшергә кирәк. Башкача булырга мөмкин түгел, әгәр без барыбызга да яхшы булуны теләсәк".
2021 ел нәтиҗәләре буенча Татарстан Республикасы Президентының мәдәният, сәламәтлек саклау, мәгариф, социаль хезмәт күрсәтү өлкәсендә оешмалар тарафыннан хезмәт күрсәтү шартлары сыйфатын бәйсез бәяләү нәтиҗәләре турында мәҗбүри гавами хисабы да Дәүләт Советы утырышында каралды. Хисапны Татарстан Республикасы Премьер-министры урынбасары Ләйлә Фазлыева тәкъдим итте.
Дәүләт Советы утырышында депутатлар шулай ук ТР Иҗтимагый палатасының "2021 елда Татарстан Республикасында граждан җәмгыяте институтларының торышы һәм үсеше турында"гы нотыгын тыңладылар. Аны палата рәисе Зилә Вәлиева тәкъдим итте.