Минтимер Шәймиев йөзүче Яна Мартыновага Универсиаданың алтын медален тапшырды

Бүген Татарстан Республикасы Дәүләт Киңәшчесе Минтимер Шәймиев XXVII Бөтендөнья җәйге Универсиаданың йөзү буенча ярышларда җиңүчеләрне бүләкләү тантанасында булды. Ул 400 метрга йөзү буенча комплекслы финал ярышларында җиңеп чыккан Казан спортчысы Яна Мартыновага алтын медаль тапшырды. Шулай ук ТР Дәүләт Киңәшчесе кулыннан көмеш һәм бронза медальләрне Меган Хоуторн (США) һәм Сакико Симидзу (Япония) алдылар.

Татарстанлылар һәрвакыт Яна Мартынова белән горурландылар, менә бүген дә ул үзенең якташларының өметен аклады, аның җиңүе Татарстанда спорт үсешенең югары булуын тагын бер кат исбатлады, дип белдерде Минтимер Шәймиев журналистлар белән әңгәмәсендә.

“Татарстан спортчылары спортның күп төрләре буенча Россия чемпионнары булдылар, аннан соң Европа дәрәҗәсенә чыктылар. Бүген дә шул мизгел җитте, без моңа барыбыз да бик шатбыз. РФ Хөкүмәте һәм Президенты булышлыгы һәм Татарстан җитәкчелегенең тырышлыгы белән бу елларда спортны үстерә һәм спорт корылмаларын төзи алдык. Шуңа күрә безнең барыбыз өчен дә бүген бәйрәм”, - диде ТР Дәүләт Киңәшчесе.

“Универсиада вакытында без дөньяга ачылабыз, аралашырга өйрәнәбез. Дөньяда цивилизацияләр диалогы, һәм шул диалогны алып бару культурасы бар. Без шул гаять зур һәм бик кирәкле процессларга кушылабыз һәм цивилизацияле дөньяның лаеклы вәкилләре булабыз”, - дип ассызыклады Минтимер Шәймиев, республика өчен Универсиаданың әһәмияте турында сөйләшкәндә.