Минтимер Шәймиев һәм Николай Патрушев Болгар музей-саклаулыгында булдылар

Бүген Татарстан Республикасы Дәүләт Киңәшчесе, Республика “Яңарыш” фондының Попечительләр Советы рәисе Минтимер Шәймиев һәм Россия Федерациясенең Куркынычсызлык Советы секретаре Николай Патрушев Болгар дәүләт тарих-архитектура музей-саклаулыгында булдылар.

Минтимер Шәймиев Болгарга теплоходта килгән Николай Патрушевны яңа елга вокзалында каршы алды һәм аңа вокзал бинасында урнашкан Болгар цивилизациясе музее экспозициясен күрсәтте.

Аннары Минтимер Шәймиев кунаклар өчен Болгар шәһәрлеге буйлап экскурсия уздырды, борынгы уникаль тарихи һәм мәдәни истәлекләр турында сөйләде, шулай ук “Яңарыш” фонды алып барган “Татарстанның мәдәни мирасы: борынгы Болгар шәһәре һәм Зөя утрау-шәһәре” проектын гамәлгә ашыру кысаларында Болгарда яңадан торгызу һәм реставрацияләү эшләренең барышы белән таныштырды.

Николай Патрушев һәм аны озата йөрүчеләр зур кызыксыну белән Идел буе болгарларының 922 елда рәсми рәвештә Ислам динен кабул итүе хөрмәтенә куелган Истәлек билгесен, Җамигъ мәчетне, Хан сараен, Һөнәрчелек остаханәләрен, Табиб йортын, Кара һәм Ак палаталарны Кече манараны, Хан төрбәсен, Ак мәчетне һәм Икмәк музеен карадылар. “Болгарның тарихи комплексы белән рәхәтләнеп таныштым. Комплексның киләчәктәге үсешен һәм хезмәткәрләргә уңышлар телим”, - дигән язма калдырган Николай Патрушев Истәлек билгесенең дәрәҗәле кунаклар китабында.

Николай Патрушев шулай ук Зөя утрау-шәһәрендә һәм XXVII Бөтендөнья җәйге Универсиада ярышларында булырга ниятли.