Рөстәм Миңнеханов һәм Минтимер Шәймиев Зөя утрау-шәһәрендә булдылар

Бүген Татарстан Республикасы Президенты Рөстәм Миңнеханов һәм Татарстан Республикасы Дәүләт киңәшчесе, “Яңарыш” фондының Попечительлек советы рәисе Минтимер Шәймиев, Казан һәм Татарстан митрополиты Анастасий Зөя утрау-шәһәрендә булдылар. Анда “Татарстанның мәдәни мирасы: борынгы Болгар шәһәре һәм Зөя утрау-шәһәре” комплекслы программа кысаларында киңкүләмле торгызу эшләре башкарылган, реставрацияләүдән соң аерым православие объектларын тәкъдир итү булды.

Митрополит Анастасий бу тантананы ачты һәм архитектура һәйкәлләрен, аерым алганда, православие чиркәүләрен торгызуга зур көч түгелүен искәртте. Митрополит Мәскәү һәм Бөтен Русь патриархы Кирилл исеменнән Минтимер Шәймиевкә “Татарстанның мәдәни мирасы: борынгы Болгар шәһәре һәм Зөя утрау-шәһәре” комплекслы программасы кысаларында һәйкәлләрне торгызу эшендә катнашкан өчен Рус православие чиркәвенең Дан һәм Намус орденын тапшырды.

“Зөя утрау-шәһәре өч елда үзгәреш кичерде, илнең иң яхшы урыннарының берсенә әйләнде”, - дип белдерде Рөстәм Миңнеханов. Бу эшчәнлек нәтиҗәсендә төбәкнең тарихи мирасы торгызылудан тыш, тәҗрибә туплана, борынгы һәйкәлләрне торгызучы реставраторлар буыны формалаша, дип билгеләп үтте ул. Ул тарихны саклау мөһимлеген искәртеп, Зөя утрау-шәһәре объектларын реставрацияләүдә катнашучыларны бүләкләүгә кереште. Инвесторларга һәм подрядчы оешмалар вәкилләренә Рәхмәт хатлары тапшырылды. Шулай ук митрополит Анастасий Татарстан митрополиясе һәм Казан епархиясе исеменнән бүләкләр тапшырды.

Бу тантананы Минтимер Шәймиев төгәлләде. Ул бу авыр хезмәттә катнашучыларга рәхмәт белдерде һәм православие дин әһелләре кулыннан алынган бүләкне аларга багышлавын белдерде. ТР Дәүләт киңәшчесе иң авыр этап башлана: чиркәүләр “аякка бастырылды”, хәзер эчен, язуларны торгызу зарурлыгын искәртте. Минтимер Шәймиев “Яңарыш” фондыннан инвесторларга һәм подрядчыларга бүләкләр тапшырды.

Зөя утрау-шәһәренә сәфәр Иоанно-Предтеченский монастыре территориясендә агачлар утырту белән тәмамланды.