Минтимер Шәймиев Россия Иҗтимагый телевидениесе Советы утырышында катнашты

Бүген Мәскәүдә Татарстан Республикасы Дәүләт Киңәшчесе Минтимер Шәймиев Россия Иҗтимагый телевидениесе Советы утырышында катнашты, ул үзенең тапшыруларын быел май аенда башлаган иде. Искә төшерәбез, Минтимер Шәймиев Иҗтимагый телевидение Советы әгъзасы санала.

Утырыш башланыр алдыннан Совет әгъзалары Россия Иҗтимагый телевидениесенең (ОТР) яңа телевизион-техник комплексы белән таныштылар. Алар яңа канал эшчәнлеген оештыру буенча ОТР җитәкчелеге эшен югары бәяләделәр.

Утырышта Совет әгъзалары ОТР генераль директоры, Халыкара радио һәм телевидение академиясе президенты Анатолий Лысенконың каналның яртыеллык тапшыру нәтиҗәләре хакында докладын тыңладылар. Аннан соң Совет әгъзалары каналның бүгенге эшчәнлеге һәм киләчәктәге бурычлары турында фикер алыштылар.

ТР Дәүләт Киңәшчесе үзенең чыгышында яңа телеканал барлыкка килүнең зур рухи әһәмиятен билгеләде. Ул ОТР Россиянең күп милләтле халкы проблемаларына якын булырга тиеш, дип ассызыклады.

Утырыштан соң, телеканал җитәкчелеге үтенече буенча, Минтимер Шәймиевнең Анатолий Лысенко белән аерым очрашуы узды.

Аннан соң Минтимер Шәймиев ОТРның “История в лицах” программасына интервью бирде, Татарстанның заманча социаль-икътисади үсеше, милләтара проблемаларны хәл итү юллары, республиканың тарихи мирасын саклау турындагы сорауларга җавап бирде.