Минтимер Шәймиев: “Болгар һәм Зөяне яңадан торгызу өчен биш ел эчендә бик күп эшләнде”

Бүген Зөя утрау-шәһәрлегендә “Яңарыш” республика фондының 5 еллыгын билгеләп үттеләр. Бу вакыйга кысаларында Зөя тарих музее экспозициясенең икенче өлешен ачу тантанасы булды.
Анда ТР Дәүләт Киңәшчесе, “Яңарыш” республика фонды попечительлек советы рәисе Минтимер Шәймиев, ТР Дәүләт Советы Рәисе урынбасары, “Яңарыш” фонды башкаручы директоры Татьяна Ларионова, ТР Яшел Үзән муниципаль районы башлыгы, Яшел Үзән мэры Александр Тыгин, ТР ФАнең Археология институты директоры Айрат Ситдиков, Зөя утрау-шәһәрлеге дәүләт тарих-архитектура һәм сәнгать музее директоры Артем Силкин һ.б. катнашты.

“Яңарыш” республика фонды инициативасы буенча Зөя утрау-шәһәрлегендә Елга вокзалы мәйданында тематик сквер хасил булачак. Чара башланганчы, Минтимер Шәймиев булачак сквер урынын карады. “ТР Президенты тарафыннан 2015 ел Парклар һәм скверлар елы дип игълан ителде. Быел Зөядә һәм Болгарда яңа скверлар булыр дип уйлыйм”, - дип билгеләп үтте ул.

ТР Тарих һәм мәдәният һәйкәлләрен торгызу республика фонды бу скверлар концепциясен эшләгәндә, аларның тарихи, мәдәни һәм ландшафт үзенчәлекләрен исәпкә алалар. ТР Дәүләт киңәшчесе сөйләвенчә, Татарстан Президентының попечительлек советлары булдыру һәм шәһәр паркларын эре предприятиеләргә беркетү карары нигезендә, Зөя утрау-шәһәрлеге өчен “Майский” совхозы җитәкчесе, ТР Дәүләт Советы депутаты Илшат Ганиев рәислегендә, борынгы Болгар шәһәре өчен “Алексеевскдорстрой” ААҖ генераль директоры Фоат Вәлиев рәислегендә попечительлек советлары оештырылды.

Экспозициянең икенче өлеше Зөянең XX гасыр һәм XXI гасыр башы тарихына, шулай ук утрауның төрмә учреждениеләре тарихына багышланган.
Минтимер Шәймиев Зөя музее тарихи материллар белән тулылануын дәвам итә, дип белдерде. “Биредәге экспонатлардан аерылып булмый. Тарих һәм мираска бик якын киләсең. Музей карамагында материаллар эзләү белән шөгыльләнүче фәнни төркемнәр эшләде, хәзер алар заманча технологияләр кулланылып тәкъдим ителә”, - диде ул.
Аның сүзләренә караганда, хәзер Зөя тарих музеенда безнең тарихның мөһим этапларын һәм хәзерге көнен күрсәтүче экспонатлар һәм документлар булуы зур кыйммәткә ия.

ТР Президентының “Яңарыш” фондын гамәлгә кую турындагы Указы имзалаганнан бирле биш ел узды. Бу вакыт эчендә Болгарны һәм Зөяне торгызу өчен бик зур эш башкарылды”, - диде Минтимер Шәймиев.

Татьяна Ларионова сөйләвенчә, Зөядә православие һәйкәлләрен торгызу эшләре дәвам итә.
“Биредә эшләрне дәвам итәбез. Зөягә килгән туристлар утрауның энегетикасын тойсын, табигате һәм мәдәнияте аларны рухландырсын, шатландырсын һәм көч бирсен өчен тырышачакбыз”, - диде ул.