Минтимер Шәймиев: “Без бергәләп тотынганда, барысы да уңышлы килеп чыга”

Бүген бишенче чакырылыш Татарстан Республикасы Дәүләт Советының бишенче утырышы ачылды. Сессия эшендә Татарстан Республикасы Президенты Рөстәм Миңнеханов, Татарстан Республикасы Дәүләт Киңәшчесе Минтимер Шәймиев, ТР Премьер-министры Илдар Халиков, Хөкүмәт әгъзалары катнашты.

Тәнәфестә ТР Дәүләт Советы бинасының икенче кат фойесында “Яңарыш” фондының 5-еллыгына багышланган күргәзмә ачылды.

Экспозициядә Болгар һәм Зөяне яңадан торгызу процессы турында сөйләүче фоторәсемнәр куелган. Тарихи ядкәрләр яңадан торгызу эшләренә кадәр нинди булган һәм хәзер алар ничек күренә, шул турыдагы фоторәсемнәр аеруча кызыклы.

Күргәзмәдә Болгар тарих-археология комплексын ЮНЕСКО Бөтендөнья мирас исемлегенә кертү турында сертификат үзәк урынны алып тора.

“Бу безнең кыска вакыт эчендә эшләгән эшләребезне күрсәтү. Без бергәләп тотынганда, барысы да уңышлы килеп чыга. Без моңа ышандык инде. Без моны үзебезнең тарихи мирасыбызны яңадан торгызуга бар халык бергә алынып исбатладык”, - диде Минтимер Шәймиев парламентарийларга күргәзмәне тәкъдим итеп.

Ул депутатларга, шулай ук республиканың зур предприятие җитәкчеләренә Болгар һәм Зөяне яңадан торгызу буенча “Яңарыш” фонды проектына ярдәм иткәннәре өчен аерым рәхмәт белдерде.

Минтимер Шәймиев “Яңарыш” фонды исеменнән Фәрит Мөхәммәтшинга фондның 5 том Хәйриячеләр китабын тапшырды, анда “Яңарыш” фондына ярдәм күрсәткән ТР Дәүләт Советы депутатларының исемнәре кертелгән.

Алга таба ТР Дәүләт Советы рәисе урынбасары, Яңарыш” фондының башкарма директоры Татьяна Ларионова барысын да күргәзмәне карарга чакырды.