Минтимер Шәймиев “Бөек Җиңүнең 70 портреты” күргәзмәсен карады

Бүген ТР Дәүләт Киңәшчесе Минтимер Шәймиев Фәрит Гобәевның “Бөек Җиңүнең 70 портреты” фотокүргәзмәсендә булды. Ул “Казан Кремле” музей-саклаулыгының “Манеж” күргәзмәләр залында эшли.

Экспозициядә Бөек Ватан сугышы батырларының аклы-каралы 70 фотопортреты урын алган. Проект “Бердәм Россия” сәяси партиясенең төбәк бүлеге ярдәмендә гамәлгә ашырылган.

ТР ның атказанган сәнгать эшлеклесе, Россия фоторәссамнар берлеге һәм Мәскәү рәссам-графиклар берлеге әгъзасы Фәрит Гобәев сүзләренчә, әлеге уй аның күңелендә инде берничә дистә ел йөргән, ә Җиңүнең 70 еллыгы алдыннан бу тагын да актуальләшкән. Баштан ул портретларны архивлардан тупларга уйлаган булган, әмма “Бердәм Россия” вәкилләре аңа республика буйлап йөреп, фотопортретлар ясарга тәкъдим иткән.

Фоторәссам 2,5 ай эчендә 200 ләп кешенең портретларын туплаган. Башка фотосурәтләр югалмасын өчен, аларны “Җиңү. Барыбыз өчен бер” китабына туплап чыгарачаклар. Анда батырларның биографик мәгълүматлары да урын алачак.

“Китап коммерцияле булырга тиеш түгел, чөнки аны батырларга бүләк итәргә кирәк, ул китапханәләрдә, музейларда булырга, ягъни һәр кешегә барып җитәргә тиеш. Күргәзмә ачылышында Фәрит Мөхәммәтшинның катнашуы минем өчен бик күңелле булды. Фотосурәтләрнең аклы-каралы булуын ул сурәтләрнең тормышчанрак булуында, әлеге чорларның мохитен тоярга ярдәм итүендә күрде, чөнки фронттан өйләренә шундый төссез фотосурәтләр җибәрә торган булганнар”, - диде ул.

Минтимер Шәймиев күргәзмәне оештыручыларга һәм Фәрит Гобәевка рәхмәт әйтте һәм аны үз эшенең остасы дип атады. “Онытылмаслык хисләр кичердем дию генә аз. Барлык хис-кичерешләремне әйтеп бирерлек сүзләр таба алмыйм. Хәзер материаллар бик күп, әмма бу күргәзмә үзенең югары дәрәҗәдә булуы белән аерыла”, - диде ул.

Татарстан Дәүләт Киңәшчесе Бөек Ватан сугышы ветераннары хакында хәтерне мәңгеләштерү өчен, фотосурәтләре тупланган китап чыгару идеясен хуплады.
“Мондый күргәзмәләрне карап, хис-кичерешләрдән бөтенләй башка кешегә әйләнәсең. Бу яңарыш һәм безне рухи баетуда искиткеч зур ярдәм”, - дип йомгаклады Минтимер Шәймиев.