Минтимер Шәймиев Джузеппе Спарта белән очрашты

Бүген Казан Кремлендә Татарстан Республикасы Дәүләт Киңәшчесе “Отель Джузеппе” ҖЧҖ генераль директоры Джузеппе Спарта белән очрашты.

Джузеппе Спарта Казанга 1993 елда килә һәм Татарстанда беренче буларак үз бизнесын булдырган чит ил кешеләренең берсе. Хәзерге көндә ул Кремль урамындагы “Отель Джузеппе” ҖЧҖнең хуҗасы һәм җитәкчесе.

Минтимер Шәймиев Джузеппе Спартага халыкка хезмәт күрсәтүдә югары культурага ирешүдә зур өлеш керткәне һәм күпьеллык уңышлы хезмәте өчен, “Фидакарь хезмәте өчен” медален тапшырды.

«Джузеппе Спарта халыкка ничек хезмәт күрсәтергә кирәклегенә өйрәтте. Италиялеләрнең халыкка хезмәт күрсәтүдә үз традицияләре, системасы һәм культурасы бар. Сез килеп безнең күзебезне ачтыгыз, җәмәгать туклануын дөрес оештырырга өйрәттегез. Бу безнең өчен яңа күренеш иде”, - дип билгеләде Минтимер Шәймиев.

Джузеппе Спарта Татарстан җитәкчелегенә бу зур бүләк өчен рәхмәт әйтте, ул монда бергә эшләгән һәм ул өйрәткән кешеләрнең күбесе үз эшләрен ачулары һәм европалылардан да яхшырак эшләүләре аның өчен чын шатлык булуын белдерде.

Очрашуда ТР Президенты ярдәмчесе Равил Моратов һәм Джузеппеның хатыны Наилә Спарта катнашты. Джузеппе Наилә белән Казанда танышкан, хәзер аларның дус гаиләсе дүрт бала үстерә.