Минтимер Шәймиев Авыл хуҗалыгы һәм эшкәртү сәнәгате хезмәткәрләре көненә багышланган тантаналы чарада катнашты

Бүген Казанның "Корстон" комплексында Авыл хуҗалыгы һәм эшкәртү сәнәгате хезмәткәрләре көненә багышланган тантаналы чара узды, аның барышында Татарстан Президенты Рөстәм Миңнеханов, “Бүгенге катлаулы шартларда без Татарстанның үз халкын югары сыйфатлы продукция белән тәэмин итә алуын исбатладык”, - дип белдерде.
 
Тантаналы чарада ТР Дәүләт Киңәшчесе Минтимер Шәймиев, ТР Президент Аппараты җитәкчесе Әсгать Сәфәров, ТР Премьер-министры урынбасары – авыл хуҗалыгы һәм азык-төлек министры Марат Әхмәтов, Әзәрбайҗан Республикасының Гадәттән тыш хәлләр һәм гражданнар оборонасы министры Кәмаледдин Гейдаров, ТР министрлыклары һәм ведомстволары җитәкчеләре, агросәнәгать комплексы вәкилләре катнашты.

Әйдәп баручы авыл хуҗалыгы җитештерүчеләре тарафыннан авыл хуҗалыгы продукциясе күргәзмәсе оештырылган. Рөстәм Миңнеханов “Просто молоко” идарәче компаниясе" ҖЧҖ, “Челны-Мясо” ЯАҖ, “Яшел Үзән сөт комбинаты” ААҖ һәм башка җәмгыятьләрнең экспозицияләрен карады.

Тантаналы чараны ачып, Татарстан Президенты, бүген иртән Лаеш районында сок җитештерү буенча яңа завод төзелешенә нигез салу тантанасы узганын искә төшерде. “Үз чималыңны тапшыру өчен бу яхшы мөмкинлек. Бүген агросәнәгать комплексы тулы циклга ия булырга тиеш: кырдан алып - кибет киштәсенә кадәр”, - дип ассызыклады ул.

Рөстәм Миңнеханов агымдагы елның катлаулы булуын билгеләде. “Кызганычка каршы, биш ел рәттән һава торышы шартлары шактый катлаулы булды һәм Марат Әхмәтов фаразлаган күрсәткечләр кайвакыт чынга ашмады. Шуңа карамастан, без 3,5 млн т бөртекле ашлык, 2 млн т шикәр чөгендере, 1,5 млн т бәрәңге, 1,8 млн т сөт алдык. Бу авыл хезмәтчәннәренең бик зур тырышлыгы”, - диде ул.

Рөстәм Миңнеханов агросәнәгать комплексында эшләүчеләргә, шулай ук Татарстан шәһәрләрендә азык-төлек ярминкәләрен оештыруда катнашучыларга рәхмәт белдерде. 
“Сәяси вәзгыять халыкны продуктлар белән тәэмин итү буенча берникадәр авырлыкларга китерде. Без Татарстанның, үзебезнең авыл хуҗалыгы җитештерүчеләренең һәм эшкәртү сәнәгатендә эшләүчеләрнең республика халкын иң югары сыйфатлы азык белән тәэмин итәрлек көче булуын күрсәттек. Бүген безнең республика куллануга караганда, күбрәк җитештерә. Бу тәҗрибәне башка төбәкләргә дә таратырга кирәк”, - диде ТР Президенты.

Ул авыл җирлеген үстерүгә юнәлтелгән барлык программаларның үз эшләрен дәвам итәчәгенә ышандырды. “Безнең бурыч – авыл халкы көнкүрешен шәһәрнекеннән аерылмаслык итү”,- дип ышандырды Рөстәм Миңнеханов. 

Татарстан Президенты тармак ветераннарына аерым рәхмәт белдерде.
“Безнең бүгенге барлык ирешкән уңышларыбыз ветераннар тарафыннан нигезләнгән. Аларның күбесе бүген безнең белән бергә. Татарстан бүген Россиянең эре сәнәгый һәм индустриаль үзәге генә түгел, бәлки иң зур авыл хуҗалыгы продукциясен җитештерүчеләрнең берсе. Бу безгә кадәр эшләгән буынның бик зур хезмәте”, - дип ассызыклады Рөстәм Миңнеханов.

Алга таба ТР Президенты агросәнәгать комплексы хезмәт алдынгыларына Татарстан Республикасы дәүләт бүләкләрен тапшырды. Хезмәткәрләрнең күбесе мактаулы исемнәргә лаек булды.