Минтимер Шәймиев республиканың Террорчылыкка каршы комиссиясе һәм Куркынычсызлык советының уртак утырышында катнашты

Бүген Татарстан Республикасы Президенты Рөстәм Миңнеханов рәислегендә Казан Кремленең Вәкиллек корпусының утырышлар залында ТРда Террорчылыкка каршы комиссиясе һәм ТР Куркынычсызлык советының уртак утырышы узды.

Утырышта ТР Дәүләт Киңәшчесе Минтимер Шәймиев, ТР Дәүләт Советы рәисе Фәрит Мөхәммәтшин, ТР Куркынычсызлык советы секретаре Айрат Шәфигуллин, ТР Куркынычсызлык советы әгъзалары, муниципаль берәмлек башлыклары, республика министрлыклары һәм ведомстволары, контроль-күзәтчелек органнары җитәкчеләре катнашты.

Көн үзәгенә Татарстан Республикасында җәмәгать тәртибен һәм иминлеген тәэмин итү буенча өстәмә чараларга кагылышлы мәсьәләләр куелган иде.

Утырышта катнашучылар ТР буенча эчке эшләр министры Артем Хохорин докладын тыңладылар. Аннан соң Казан муниципаль берәмлек башлыгы Илсур Метшин, Түбән Кама муниципаль районы башлыгы Айдар Метшин, Татарстан Республикасы Прокуроры Илдүс Нәфыйков чыгыш ясады. “Имин шәһәр” комплексын тормышка ашыруның барышы белән ТР Премьер-министр урынбасары – ТР мәгълүматлаштыру һәм элемтә министры Роман Шәйхетдинов таныштырды.

Татарстан Президенты Рөстәм Миңнеханов участок полиция хезмәткәрләре өчен АТК  (административ-торак комплекс), җәмәгать тәртип саклау пунктлары төзелеше буенча эшләрнең нәтиҗәлелеген югары бәяләде. Рөстәм Миңнеханов билгеләгәнчә, АТК төзелгән авылларда, анда яшәүчеләрнең сөйләве буенча, җинаятьчелекнең кимүе күзәтелә.

Моннан тыш, Рөстәм Миңнеханов ТР төзелеш, архитектура һәм ТКХ министрына участок полиция хезмәткәрләренә торакны үзләре эшләгән участоктан бирү мәсьәләсен эшләп бетерергә кушты.

ТР Президенты шулай ук җәмәгать тәртибен саклауга Казанда халыкара спорт чараларында үзләрен уңай яктан күрсәткән волонтерларны да җәлеп итәргә тәкъдим итте.

Рөстәм Миңнеханов ассызыклаганча, җәмәгать тәртибен саклау – ул уртак эш, һәм куркынычсызлык буенча мәсьәләләрне хәл иткәндә хакимият һәм җәмгыятьнең барлык институтлары катнашырга тиеш.