ТР Дәүләт Советында Татарстан Конституциясе көне һәм республика Конституция суды оештырылуга 15 ел тулу уңаеннан утырыш узды

Бүген ТР Дәүләт Советының кече залында ТР Премьер-министры Илдар Халиков рәислегендә ТР Конституциясе көне һәм республика Конституция суды оештырылуга 15 ел тулу уңаеннан тантаналы утырыш узды.

Утырышны ачып, Илдар Халиков анда катнашучыларны  Татарстан Республикасы Конституциясен кабул итүгә 23 ел тулу уңаеннан котлады.

“Татарстан элеккеге СССР территориясендә беренчеләрдән булып бәйсезлек яулаган һәм Конституцияле булган төбәк санала. Без бик күпләр өчен үрнәк булдык, ә безнең Төп законның үзенчәлеге шунда, ул күп милләтләрне берләштерүгә иреште”, - дип билгеләде ТР Премьер-министры.

Илдар Халиков шулай ук Татарстан Президенты Рөстәм Миңнехановның ТР Конституция суды аппараты хезмәткәрләренә һәм судьяларга сәламен җиткерде.
"1922 елда Татарстан Республикасы Конституциясен кабул итү яңа дәүләтчелек булдыруда мөһим адым булды. Ул халыклар арасында тигезлек, социаль дөреслек урнаштырды. Конституция суды эшчәнлек дәверендә ул җитди юл үтте һәм үзен нәтиҗәле суд органы буларак күрсәтте", - диелгән иде анда.

ТР Конституция судының эшчәнлеге һәм тарихы турындагы фильмны караганнан соң, Илдар Халиков ТР Дәүләт Киңәшчесе Минтимер Шәймиевкә сүз бирде.
“Безнең яңа Конституция, үзенең сәяси статусын, икътисади, социаль һәм мәдәни үсешен мөстәкыйль билгеләүдә республика халкының хокукын ныгытырга тиеш иде. Минемчә, яңа Татарстанны булдырганда бу безнең иң хәлиткеч адым булды”, - дип билгеләде ТР Дәүләт Киңәшчесе.
Минтимер Шәймиев сүзләренчә, Конституция суды бүген республикада бик кирәк. Гражданнарның шәхси, сәяси, мәдәни, социаль-икътисади һәм башка хокукларын яклау өчен Конституция судына мөрәҗәгать итүләре, аларның хакимиятнең бу тармагына ышанычын күрсәтә.

Татарстан Республикасы Конституция суды рәисе Фәрхәт Хөснетдинов үзенең чыгышында, Татарстан Конституциясенең республикада вакыт белән сыналган документ булуын билгеләде.

Утырышта шулай ук ТР Дәүләт Советы рәисе урынбасары Римма Ратникова, ТР Югары суды рәисе Илгиз Гыйләҗев, ТР юстиция министры Лариса Глухова, законлылык һәм хокук тәртибе буенча ТР Дәүләт Советы Комитеты рәисе Шакир Яһүдин, КФУның юридик факультет деканы вазифаларын башкаручы Лилия Бакулина чыгыш ясады.
 
Утырыш тәмамланганда бүләкләү тантанасы булды.