ЯҢАЛЫКЛАР

10 мартта Казан Ратушасында барган Казан шәһәре Думасының 48 нче сессиясендә Дума рәисе - Казан шәһәре башлыгы Илсур Метшин, узган елгы эшчәнлеге буенча хисабында шәһәр транспорт инфраструктурасы проблемаларына кагылды.

Казан урамнарында елына 40 меңләп автотранспорт өстәлү һәм һәр көн саен 280 меңнән күбрәк автомобиль транспорты булу юлларда "бөке"ләр күплегенә китерә, бу аеруча шәһәр үзәгенә китерә торган юлларга хас, дип, шәһәр башлыгы башкала юллары 1 мең кешегә уртача 100 автомобиль хисабыннан төзелгәнен, хәзер исә 1 мең кешегә 240 авто туры килүен, ә инде 2013 елга барлыгы 400 меңнән күбрәк машина булачагын һәм, вазгыятьне тамырдан үзгәртү өчен, чара күрергә кирәклеген искәртте. Мэр, моның өчен булган юлларны реконструкцияләү, җәмгысе 65 чакрым яңа юл салу, берничә катлы 15 юл аермасы, җәяүлеләр өчен 16 кичү төзү планлаштырыла, дисә дә, сессиядә катнашып чыгыш ясаган ТР Хөкүмәте башлыгы Рөстәм Миңнеханов, быелга 10 млрд. сумлык бюджет кредиты алабыз һәм бер өлешен декабрьдә алдык инде, аны шәһәр үзәгендәге төп объектларга тотыйк, чөнки шәһәр транспортка тончыга, машиналар шәһәрдә өстенлек алды, ә юл кичүләре, юл аермалары салып кына да хәлне әллә ни үзгәртеп булмаячак, дип басым ясап әйтте. "Транспорт белән шәһәргә, шәһәр үзәгенә керүдә ниндидер чикләүләр кертелсен, уйлашыгыз, юл читендә туктап торган автотранспортны бөтенләй алдыртырга кирәк, шул вакытта юлларның транспорт үткәреп җибәрү үзлеге сизелерлек артачак. Шәһәр хакимиятенә транспорт инфраструктурасын җайга салу мәсьәләсен хәл итү бурычы куела. Чит ил тәҗрибәсен өйрәнегез, әйтик, Сингапурныкын", - дип киңәш итте Премьер-министр.

"КАМАЗ" ААҖ кризиска кадәрге җитештерү дәрәҗәсенә 2013 елда ирешә алачак. "КАМАЗ" ААҖ генераль директоры Сергей Когогин Чаллы шәһәр советының 46 нчы сессиясендә әнә шул хакта хәбәр итте.

"2009 елда Россия автомобиль сәнәгате яшәүдән туктарга тиеш иде. Мондый карар ел башында ук чыкты. 2009 елда предприятие шактый зыян күрсә дә, без моны булдырмауга ирештек", - дип хәбәр итте Сергей Когогин. Аның сүзләренә караганда, 2009 елда предприятие кризиска каршы программаны гамәлгә ашыруның ике циклын башкарган, һәм бу бурычны 100 процентка үтәгән. "КАМАЗ" җитәкчелеге тарафыннан 2010 елга бурычлар формалаштырылган. "Кризис шартларында без предприятиене үстерү стратегиясе белән шөгыльләнүдән туктамадык", - дип ассызыклады "КАМАЗ" ААҖ генераль директоры.

"Ел лидеры-2010" балалар һәм яшьләр иҗтимагый берләшмәләре лидерлары һәм җитәкчеләре республика конкурсында катнашу өчен гаризалар кабул итүнең вакыты төгәлләнде.

Конкурс ике этапта (район һәм республика) уза. 2010 елда Казан, Түбән Кама, Алабуга, Әлмәт, Спас, Әлки, Чирмешән, Тәтеш, Зәй һәм Арчада район этаплары узды инде. Конкурста шулай ук республиканың зур оешмалары вәкилләре дә катнашачак.

Сәнәгать һәм сәүдә министры Равил Зарипов җитәкчелегендәге Татарстан делегациясе бу көннәрдә Башкортстанда эш сәфәрендә. Визит барышында БР Хөкүмәте Премьер-министры урынбасары-сәнәгать һәм тышкы икътисади элемтәләр министры Юрий Пустовгаров белән ике яклы хезмәттәшлекне үстерүгә багышланган очрашу планлаштырылган. Аерым алганда, ике республика арасында сәүдә-икътисади, социаль-мәдәни өлкәләрдә хезмәттәшлекне җәелдерү, ике республика Хөкүмәтләре арасында 2010-2012 елларда хезмәттәшлекне үстерү чаралары, Татарстанның күрше республикадагы икътисади-сәүдә вәкиллеге эшчәнлеге каралачак. Шулай ук "АНК "Башнефть", "Уфа мотор төзү җитештерү берләшмәсе" ААҖ, "Буринтех", "Ласселсбергер" ҖЧҖ, Уфа трансформатор заводы җитәкчелеге белән очрашулар планлаштырылган.

Казан шәһәре Думасының 48 нче сессиясе 10 мартка билгеләнгән һәм аның эшендә ТР Премьер-министры Рөстәм Миңнеханов катнашыр дип көтелә. Чираттагы сессиядә Дума рәисе - Казан мэры Илсур Метшин узган елгы эшчәнлек буенча хисап тотачак, шулай ук Казан Думасы, Башкарма комитеты, контроль-хисап палатасы эшчәнлеге, муниципаль милекне приватизацияләүдә фаразланган программа-план үтәлеше буенча да хисаплар ясалачак.

10 - 12 март көннәрендә Мәскәүдә "Спорт-2010" дигән Халыкара махсуслаштырылган күргәзмә узачак. Аны спорт индустриясе өлкәсендә эшләүчеләр зур вакыйга буларак бәяли. Күргәзмәнең эшлекле программасы үз эченә экспертлар катнашында тармакны үстерү перспективалары һәм проблемалар хакында фикерләшүне ала.

Татарстанның спорт индустриясе күргәзмәдә республиканың берләштерелгән стендында тәкъдим ителәчәк. Ул 2013 елгы Универсиада, Казанда узган Беренче Бөтенроссия спорт форумы, Спорт һәм сәламәт яшәү рәвеше елы, Олимпия хәрәкәте һәм балалар, массакүләм спортның торышы хакында сөйләячәк. Күргәзмә кысаларында Татарстан һәм 2013 елгы Универсиада презантацияләнәчәк.

Россия Федерациясе Президентының Идел буе федераль округындагы тулы вәкаләтле вәкиле Григорий Рапота Идел буе федераль округына кергән диния нәзарәтләре рәисләре белән очраша. ТР Мөселманнары диния нәзарәте матбугат хезмәте хәбәр иткәнчә, анда Татарстан мөфтие Госман хәзрәт Исхакыйның катнашуы да көтелә. Очрашу Чувашия Республикасы башкаласы Чабаксар шәһәрендә узачак.

Татарстанда машина төзелеше, производство техникасы буенча Алмания-Россия компетенция үзәге төзелергә мөмкин. Аны оештыру мәсьәләләре күптән түгел ТР Сәнәгать һәм сәүдә министрлыгында Саксония делегациясе белән очрашуда күтәрелгән иде. Ул вакытта яклар Татарстанда әлеге үзәкне төзү буенча алга таба эшчәнлекне дәвам итү турындагы беркетмә имзалады.

Татарстанда Компетенцияләр үзәге төзү турындагы карар узган елның апрелендә Саксония Премьер-министры С.Тиллих җитәкчелегендәге делегациянең республикага сәфәре вакытында кабул ителгән иде. Ул чагында ТР Сәнәгать һәм сәүдә министрлыгы белән Саксониянең Икътисад һәм хезмәт министрлыгы арасында Ниятләр турында беркетмәгә кул куелды.

ТР Мәгариф һәм фән министрлыгы, Казан дәүләт университеты, Социаль һәм гуманитар белемнәр институты, Россия мәгариф академиясенең Укыту эчтәлеге һәм методлары институты 2010 елның 19-22 апрель көннәрендә Казанда узачак икенче бөтенроссия фәнни-гамәли конференциясенә чакыра. "Электрон Казан - 2010" дип аталган җыен белем бирүдә мәгълүмати-коммуникатив технологияләрне куллануның хокукый аспектларына багышлана.

Быел Татарстанда бердәм республика имтиханын тапшыру буенча эксперимент дәвам итәчәк. Бердәм республика имтиханы (БРИ, татар телендәге БДИның тиңдәше) нәтиҗәләре бары тик Татарстан территориясендә генә үз көченә ия. Шулай булгач республика территориясендәге вузларга керергә теләүчеләргә генә аны тапшыру кулай. БРИ Татарстанда 2006 елдан бирле эксперимент тәртибендә тапшырыла, әмма 2008 елның ноябрендә РФ Мәгариф һәм фән министрлыгы БДИны тапшырганда рус телен куллануны раслады.