ЯҢАЛЫКЛАР

5 мартта “Пирамида” мәдәни-күңел ачу үзәгендә “Ел хатын-кызы, “Ел ир-егете” республика конкурсында җиңүчеләр игълан ителде.

Наноиндустрия өлкәсендә инвестиция проектларын гамәлгә ашыру мәсьәләләре белән шөгыльләнүче Иран делегациясе "Идея" технопаркында булды. Бу хакта Казан технопаркының матбугат хезмәте хәбәр итә.

Иран делегациясенең "Идея" технопаркы генераль директоры Сергей Юшко белән очрашуы технопаркның эшчәнлеге һәм инфраструктурасы, технопарк тарафыннан гамәлгә ашырылучы проектлар һәм күрсәтелүче хезмәтләр белән танышу максатыннан узды.

2 мартта Татарстан 2009 елда күп катлы йортларны капиталь төзекләндерү буенча хисабын, ниһаять, Торак-коммуналь хуҗалыгын реформалаштыру буенча федераль фондка тапшырган. ТР төзелеш, архитектура һәм торак-коммуналь хуҗалыгы министры Марат Хөснуллин моны атнаның мөһим яңалыгы буларак атады. Бүгенге көндә республикада быелгы капиталь ремонтка федераль фондтан финанслар алу өчен заявкалар формалаштыру бара. Бу хакта бүген ТР Министрлар Кабинетында Премьер-министр Рөстәм Миңнеханов рәислегендә узган видеокиңәшмәдә сүз булды. Министр белдерүенчә, агымдагы ел өчен заявкалар формалаштыру муниципалитетларда бик сүлпән бара. “ Кайбер районнар үзләрен бу эшне беренче тапкыр гына башкаручы итеп тота. Фонд эшеннән моңа кадәр хәбәрдар булмаган кебек сораулар бирәләр. Бу эшне узган елларда да шул ук белгечләр башкарды бит инде”, -дип гаҗәпләнә министр. Бүгенге көндә министрлык бер генә муниципаль берәмлекнең дә капиталь ремонтка заявкасын Мәскәүгә тәкъдим итәрлек дәрәҗәдә әзер булмавын таный. Муниципаль берәмлек җитәкчеләренә бу эшкә контрольне көчәйтергә һәм документларны кыска вакытларда өлгертергә кушылды.

Пенза өлкәсендә "Идел буе федераль округында халыкка югары технологик медицина ярдәмен күрсәтүне камилләштерү мәсьәләләре һәм юллары" темасына киңәшмә уза. Аның эшендә ТР сәламәтлек саклау министры Айрат Фәррахов, Республика клиник хастаханәсе баш табибы Михаил Кормачев катнашалар.

Киңәшмә башланыр алдыннан, кунаклар Россия сәламәтлек саклау һәм социаль үсеш министрлыгының йөрәк-кан тамырлары хирургиясе үзәге һәм Н.Бурденко исемендәге өлкә клиник хастаханәсенең Ир-ат сәламәтлеге үзәге эше белән танышты.

4 мартта Казан Ратушасында “Елның иң яхшы укытучысы-2010” шәһәр конкурсы йомгаклары игълан ителеп, җиңүчеләр бүләкләнде. Шәһәр Башкарма комитетының мәгариф идарәсе карамагында барлыгы 30 меңләп педагог исәпләнә, шулардан мәктәпләрдә 17 меңләп укытучы һәм педагог эшли. Быелгы 20 нче юбилей конкурсында катнашу теләге белән 400дән артык укытучы заявка биргән булса (элеккеге елда 350 чамасы булган), район этапларында 90ы җиңүче буларак игълан ителгән.

4 мартта Татарстан Республикасы Президенты Минтимер Шәймиев ТР Зеленодольск муниципаль районының Свияжск утрау-шәһәрендә булды. Эш сәфәре барышында Минтимер Шәймиев утраудагы истәлекле урыннар белән танышты, Свияжск утрау-шәһәрен торгызуны башлап йөрүче төркем әгъзалары белән очрашты.

4 мартта ТР Дәүләт Советының Законлылык һәм хокук тәртибе комитеты утырышында депутатлар беренче укылышта "Татарстан Республикасы Президенты вазифасына керү турында" ТР Законының 2 статьясына үзгәрешләр кертү хакында" закон проектын карап тикшерде. Әлеге закон проекты Татарстан парламентына комитет рәисе Шакир Яһудин, депутатлар Рафил Ногманов һәм Василий Логинов тарафыннан кертелгән.

Яңа эшләнгән закон проекты республика законнарын "Россия Федерациясе дәүләт хакимиятенең закон чыгару (вәкиллекле) һәм башкарма органнарын оештыруның гомуми принциплары турында" федераль законга тәңгәлләштерү максатында эшләнгән. Бу законның 18 статьясы РФ субъектының югары вазифаи заты вәкаләтләре йөкләнгән Россия Федерациясе гражданины вазифасына керү тәртибен билгели.

Татарстанда Колорадо дәүләт университеты филиалы ачылырга мөмкин. Дөнья күләмендә танылу алган әлеге бизнес мәктәбенең республикада вәкиллеген булдыру мәсьәләсе ТР икътисад министры Марат Сафиуллинның уку йорты деканы урынбасары Джон Хоксмайер белән очрашуында күтәрелде, дип хәбәр итә министрлыкның матбугат хезмәте. Очрашуда шулай ук мәгариф программалары өлкәсендә ике арада стратегик хезмәттәшлек мөмкинлекләре каралган.

Хезмәттәшлекнең технологик компонентларына - белем алуга кандидатлар сайлап алу механизмнары, алган белемнәрнең сыйфатын һәм сорау табу дәрәҗәсен бәяләү, мәгариф программаларына административ һәм академик күзәтү булдыруга яклар аерым тукталып узган. Нигез академик партнерны сайлап алу максатыннан, якын араларда Колорадо штаты университетының МВА программалары әзерләнеп, республика вузларына презентацияләнәчәк.

4 мартта Казанда Татарстан Дәүләт Советының Дәүләт төзелеше һәм җирле үзидарә комитеты утырышы булды. Чараны комитет рәисе Валентина Липужина үткәрде.

Утырышның көн тәртибенә 24 мәсьәлә чыгарылган иде. Халык ышанычлылары җирле үзидарәләр, депутат статусы, референдумнар үткәрү, территорияләрнең чикләрен һәм муниципаль берәмлекләрнең статусын билгеләүгә кагылышлы республика законнарына төзәтмәләрне карады. Аларның соңгысы Татарстанның Алабуга, Балык Бистәсе, Чүпрәле, Азнакай һәм Буа районнарына кагыла. Биредә сүз аларның составында муниципаль берәмлекләрне эреләндерү хакында бара.

4 мартта ТР Премьер-министры Рөстәм Миңнеханов Түбән Камада нефть эшкәртү һәм нефть химиясе заводлары комплексы төзелеше барышын карады, дип хәбәр итә Министрлар Кабинетының матбугат хезмәте. Хөкүмәт башлыгы, аерым алганда, күкерт җитештерү мәйданы, чистарту корылмалары, насос станцияләре төзелеше белән танышкан. Премьер-министр шулай ук янгын сүндерү депосын, беренче җибәрү комплексының көнкүреш корпусын һ.б. карарга өлгергән. Объектлар төзелеше белән урында танышканнан соң, "ТАНЕКО" комплексы төзелеше проектын гамәлгә ашыру мәсьәләләренә багышланган киңәшмә узган. Анда эшләрнең торышы, февральдә башкарылган эшләргә йомгак һәм март аена бурычлар, алдагы 3 айга перспективалар хакында "ТАНЕКО"ның генераль директоры Хәмзә Баһманов чыгышы тыңланган.