ЯҢАЛЫКЛАР

24 декабрьдә 150 кешедән торган Татарстан делегациясе Мәскәүгә Президент чыршысына бара. Бу бәйрәмгә бөтен илдән 5 меңгә якын бала җыелачак. Россиянең бөтен төбәгеннән балаларны җыя торган традицион Президент чыршысы 26 декабрьдә Дәүләт Кремль сараенда була. Татарстаннан Мәскәүгә 120 укучы (65 кыз һәм 55 малай) һәм 30 озатып йөрүче бара, дип хәбәр иттеләр "Татар-информ" мәгълүмат агентлыгы хәбәрчесенә ТР Яшьләр эшләре, спорт һәм туристлык министрлыгының әйдәп баручы киңәшчесе Виктор Солосин.

11 декабрьдә ТР Мәдәният министрлыгында татар әдәбияты классигы, шагыйрь, меценат Дәрдемәнднең (Закир Рәмиев) тууына 150 ел тулуга багышланган "Дәрдемәнд мирасы һәм хәзерге заман" дип аталган Бөтенроссия конференциясе ачылды.

11 декабрьдә Казан Кремлендә Татарстан Республикасы Президенты Минтимер Шәймиев рәислегендә 1941-1945 еллардагы Бөек Ватан сугышында Җиңүнең 65 еллыгын бәйрәм итүне әзерләү һәм уздыру буенча оештыру комитеты утырышы булды.

Бу көннәрдә Венециядә сәнәгать округлары, кече һәм урта бизнес буенча Россия-Италия эшче төркеменең 15 нче утырышы уза. Россия делегациясе составында аның эшендә ТР икътисад министры Марат Сафиуллин да катнаша. Бүген нанотехнологияләргә багышланган "түгәрәк өстәл" утыршында Татарстанның икътисади мөмкинлекләре, республикада инновацион эшчәнлеккә дәүләт ярдәме буенча күрелә торган чаралар тәкъдим ителде.

Казанда "Без булдырабыз!"дигән Татарстан яшьләре форумы ачылды. Форум ачылышында ТР Президенты Минтимер Шәймиев катнашты.

7-11 декабрьдә Бөтендөнья банкының консультация төркеме вәкилләре Татарстанның инновацион эшчәнлек субъектлары белән очрашулар үткәрә. 9 декабрьдә абруйлы халыкара финанс оешмасы вәкилләре "Идея" технопаркы резидентлары белән очрашты. Очрашуда "Модуль-инжиниринг сервис" ҖЧҖнең генераль директоры С.Паршин, "Техномир" үзәге коммерция директоры А.Мамедов, "Активные Системы" ҖЧҖнең техник директоры А.Щукин, "ГКС-Наука" директоры В.Проккоев, метрология үзәге директоры В.Фафурин һәм "ТР Лазер үзәге" ҖЧҖ директоры Н.Насонов катнашты.

Дубнада РФ икътисади үсеш министры Эльвира Нәбиуллина махсус икътисади зона резидентлары белән очрашулар һәм киңәшмәләр үткәрде. Анда МИЗ белән идарә итү һәм үстерү мәсьәләләре, шулай ук резидентларның проектларын финанслау буенча фикер алыштылар. Чарада Махсус икътисади зоналар белән идарә итү буенча Федераль агентлыкның ТР буенча территориаль идарәсе һәм "Алабуга" МИЗ компания-резидентлары вәкилләре катнашты.

Быелның ун аенда Казанда 12 мең 369 сабый туган. Үлүчеләр исә 4 процентка кимрәк. Социологлар фикеренчә, мондый хәл башкалада соңгы 18 елда тәүге тапкыр күзәтелә. Былтыр Казанда 13 мең 850 бала туса, 14 мең 400 кеше үлгән. Чагыштыру өчен, быел Самарада якты дөньяга 5 мең 808 сабый килгән, шул ук вакытта 9 мең 960 кеше бакый дөньяга күчкән. Түбән Новгородта әлеге күрсәткечләр 6 мең 366 һәм 9 мең 960 кеше тәшкил иткән.

11 һәм 12 декабрь көннәрендә Бөтендөнья татар конгрессы башкарма комитетының быелгы эшчәнлеге нәтиҗәләре буенча киңәйтелгән утырыш узачак. Әлеге чара кысаларында башкарма комитет һәм Бөтендөнья башкорт корылтае президиумының уртак җыелышы да булыр ди көтелә.

10-11 декабрь көннәрендә ТР Сәламәтлек саклау министрлыгы һәм "Росплазма" федераль дәүләт учреждениесе Татарстанның иң яхшы донорларын котлау чараларын уздыра. Бу чаралар кысаларында 10 декабрьдә "Татмедиа" агентлыгында "2009 елда Татарстанда донорлыкны үстерү нәтиҗәләре" темасына матбугат конференциясе узачак. Анда ТР сәламәтлек саклау министры Айрат Фәррахов, "Росплазма" учреждениесе җитәкчелеге катнашыр дип көтелә.

11 декабрьдә "Ак Барс" мәдәният үзәгендә елга иң күп плазма һәм кан тапшыручыларны котлау тантанасы оештырыла. Бәйрәмгә ТР Президентының социаль мәсьәләләр буенча Дәүләт киңәшчесе Татьяна Ларионова, Казан башлыгы Илсур Метшин, шәһәр һәм районнар хакимиятләре башлыклары, "Росплазма" учреждениесе җитәкчелеге, табиблар, иҗтимагый оешмалар һәм дини конфессияләр вәкилләре чакырыла.