ЯҢАЛЫКЛАР

Татарстанда Колорадо дәүләт университеты филиалы ачылырга мөмкин. Дөнья күләмендә танылу алган әлеге бизнес мәктәбенең республикада вәкиллеген булдыру мәсьәләсе ТР икътисад министры Марат Сафиуллинның уку йорты деканы урынбасары Джон Хоксмайер белән очрашуында күтәрелде, дип хәбәр итә министрлыкның матбугат хезмәте. Очрашуда шулай ук мәгариф программалары өлкәсендә ике арада стратегик хезмәттәшлек мөмкинлекләре каралган.

Хезмәттәшлекнең технологик компонентларына - белем алуга кандидатлар сайлап алу механизмнары, алган белемнәрнең сыйфатын һәм сорау табу дәрәҗәсен бәяләү, мәгариф программаларына административ һәм академик күзәтү булдыруга яклар аерым тукталып узган. Нигез академик партнерны сайлап алу максатыннан, якын араларда Колорадо штаты университетының МВА программалары әзерләнеп, республика вузларына презентацияләнәчәк.

4 мартта Казанда Татарстан Дәүләт Советының Дәүләт төзелеше һәм җирле үзидарә комитеты утырышы булды. Чараны комитет рәисе Валентина Липужина үткәрде.

Утырышның көн тәртибенә 24 мәсьәлә чыгарылган иде. Халык ышанычлылары җирле үзидарәләр, депутат статусы, референдумнар үткәрү, территорияләрнең чикләрен һәм муниципаль берәмлекләрнең статусын билгеләүгә кагылышлы республика законнарына төзәтмәләрне карады. Аларның соңгысы Татарстанның Алабуга, Балык Бистәсе, Чүпрәле, Азнакай һәм Буа районнарына кагыла. Биредә сүз аларның составында муниципаль берәмлекләрне эреләндерү хакында бара.

4 мартта ТР Премьер-министры Рөстәм Миңнеханов Түбән Камада нефть эшкәртү һәм нефть химиясе заводлары комплексы төзелеше барышын карады, дип хәбәр итә Министрлар Кабинетының матбугат хезмәте. Хөкүмәт башлыгы, аерым алганда, күкерт җитештерү мәйданы, чистарту корылмалары, насос станцияләре төзелеше белән танышкан. Премьер-министр шулай ук янгын сүндерү депосын, беренче җибәрү комплексының көнкүреш корпусын һ.б. карарга өлгергән. Объектлар төзелеше белән урында танышканнан соң, "ТАНЕКО" комплексы төзелеше проектын гамәлгә ашыру мәсьәләләренә багышланган киңәшмә узган. Анда эшләрнең торышы, февральдә башкарылган эшләргә йомгак һәм март аена бурычлар, алдагы 3 айга перспективалар хакында "ТАНЕКО"ның генераль директоры Хәмзә Баһманов чыгышы тыңланган.

4 мартта ТР Дәүләт Советының Законлылык һәм хокук тәртибе комитеты утырышында депутатлар беренче укылышта "Татарстан Республикасында Кеше хокуклары буенча вәкаләтле вәкил турында" ТР Законына һәм Татарстан Республикасы Административ хокук бозулар кодексының 2.3 статьясына үзгәрешләр кертү хакында" ТР законы проектын беренче укылышта карап тикшерде.

Әлеге закон проекты белән, бала хокукларының дәүләт тарафыннан яклану гарантияләрен көчәйтү, аларның дәүләт органнары, җирле үзидарә органнары һәм вазыфаи затлар тарафыннан үтәлүенә һәм хөрмәт ителүенә этәргеч бирү максатыннан, Татарстан Республикасында Бала хокуклары буенча вәкаләтле вәкил вазифасын кертергә тәкъдим ителә. Шунда әлеге дәүләт вазифасын биләүченең Татарстан Республикасында Кеше хокуклары буенча вәкилнең урынбасары булып торуы да күрсәтелә. Проектның 39 статьясында Балалар хокуклары буенча вәкилнең вәкаләтләре турында мәгълүмат бирелә.

Комитет рәисе Шакир Яһудин хәбәр иткәнчә, бу вазифага кандидатны ТР Президенты тәкъдим итә, ә Татарстан Дәүләт Советы аны 5 елга сайлап куя.

3 мартта Мәскәүдә “Мәскәү банкара валюта биржасы” ЯАҖ һәм Татарстан Республикасы арасында хезмәттәшлек турындагы килешү имзаланды. Килешү текстына Татарстан Республикасы Премьер-министры Рөстәм Миңнеханов һәм ММВБ президенты Константин Корищенко кул куйды.

Әлеге документ республикада инновацион инфраструктура үсешенә, югары технологияле продукция эшләп чыгару буенча проектларны гамәлгә ашыруга инвестицияләр җәлеп итәргә, кече һәм урта эшкуарлыкны, шулай ук икътисадның инновацион секторында дәүләт-шәхси партнерлыкны үстерергә ярдәм итәчәк.

3 мартта Кремльдә ТР Президенты Минтимер Шәймиев рәислегендә Хәйрия эшчәнлеге буенча республика советы утырышы узды.

Ял көнендә Төмән шәһәренең "Төзүче" мәдәният сараенда ике атналык Татар мәдәнияте көннәрен ачуга багышланган тантана булып узды. Тантана мәҗлесендә һәм өлкә татарлары милли-мәдәни мохтәрияте рәисе Ришат Җиһаншин катнашты. Виктор Хоменко өлкә губернаторы Владимир Якушевның татарларны милли Мәдәният көннәре белән котлавын ишеттерде, үзе дә бик җылы котлады. Тантана кичәсен өлкә Милли мәдәниятлар йортының татар бүлеге җиткәчесе Гөлфия Хәлитова белән "Татар егете-2009" бәйгесе лауреаты Разил Сабитов алып барды.

Менә инде икенче ел Татар мәдәнияте көннәрен ачуда тулысынча яшьләр катнашты: Фәрит Корманов җитәкчелегендәге "Яшь буын" оешмасы һәм Руслан Мамеев исемендәге Татар яшьләре берлеге.

3 мартта ТР Дәүләт Советының Икътисад, инвестицияләр һәм эшкуарлык комитеты утырышында депутатлар "Татарстан Республикасы муниципаль берәмлекләре һәм шәһәр округлары җирле үзидарә органнарына күпфатирлы йортларны һәм (яки) башка күчемсез милек объектларын өлешләп төзү өлкәсендә дәүләт контроле һәм күзәтчелеге алып бару буенча Татарстан Республикасы дәүләт вәкаләтләрен бирү турында" ТР Законының 1 статьясына үзгәреш кертү хакында" ТР закон проектын беренче укылышка әзерләде. Әлеге закон проекты республика законнарын федераль закон актларына тәңгәлләштерү максатында эшләнгән.

Татарстанның нефть компанияләре 2010 елның февраль аенда 2487,7 мең тонна "кара алтын" чыгарган, бу 2009 елның февраленә карата 100,4 процент тәшкил итә. 2 ай эчендә 5246,3 мең тонна нефть чыгарылган, узган елның шул чорына карата үсеш 0,6 процент. Бәйсез нефть компанияләре тарафыннан 1063,9 мең тонна "кара алтын" табылган, бу 2009 елның гыйнвар-февраль айларына караганда 0,4 процентка артык.

"Татнефть" ААҖ февральдә 1984,5 мең тонна нефть чыгарган, бу 2009 елның февраленә карата - 100,5, план күрсәткеченә карата 101,9 процент тәшкил итә. Компаниядән хәбәр итүләренчә, агымдагы елның ике аенда 4182,4 мең тонна "кара алтын" (планнан тыш - 76,8 мең тонна) табылган, бу 2009 елның гыйнвар-февраль айларына карата 100,7 процент дигән сүз.

Түбән Кама “Шин” ААҖдә шин заводының җыю производствосын реконструкцияләү эше төгәлләнеп килә. Әлеге проектны “Татнефть” финанслый. Бу эш җиңел автомобиль шин­­нары сыйфатын яхшыртуга юнәлдерелгән. Нәтиҗәдә яңа продукция күләме тагын 960 мең данәгә артып, 2,86 миллион (“мораль яктан” искергән диагональ конструкцияле шиннарга алмашка) данәгә җитәчәк. “Татнефть” ААҖ шин бизнесына моннан ун ел элегрәк – 2000 елда, компания Татарстан Хөкүмәтеннән предприятиенең акцияләрен сатып алгач кергән иде. “Татнефть” Түбән Кама “Шин” ААҖне үстерүгә 30 миллиард сумнан артыграк инвестиция кертте. “КАМА-EURO” дигән яңа бренд белән радиаль шиннар җитештерү аның тәүге әһәмиятле проектына әйләнде.